იტალიელი მსაჯი ეუჯენიო აბატისტა, რომელიც სერია B-ს შეხვედრებს ემსახურება, სიკვდილს საფეხბურთო კლუბ “აველინოს” გულშემატკივარმა ჩირო კარბონემ გადაარჩინა. როგორც ცნობილი გახდა, აბატისტას გასულ ოთხშაბათს ავტოსაგზაო შემთხვევა მოუვიდა, როდესაც მის მანქანას ტრაილერი დაეჯახა. ამ ყველაფერს კარბონე შეესწრო, რომელმაც საკუთარი სიცოცხლის რისკის ფასად გზა გადაკვეთა, ეუჯენიოს პირველადი დახმარება გაუწია და მომხდარის შესახებ პოლიციას აცნობა, რის შემდგომაც იტალიელი არბიტრი უახლოეს საავადმყოფოში გადაიყვანეს, შემდეგ კი აბატისტა მომჯობინდა.
აპენინელ არბიტრს ავტოავარია ნეაპოლი-ბარის გზატკეცილზე მოუვიდა და როგორც ირკვევა, იგი საათში 110/120 კმ სიჩქარით მოძრაობდა. აბატისტა იმ დროისთვის სახლში სალერნოდან ბრუნდებოდა, სადაც “არეკის” სტადიონზე “სალერნიტანასა” და “ენტელას” (2:2) მატჩი იმსაჯა.
ეუჯენიომ თავის გმირს სპეციალური წერილი მისწერა და მადლობა გადაუხადა. სწორედ ხსენებული წერილიდან გასაჯაროვდა აღნიშნული ინფორმაცია.