დავით ზირაქაშვილისა და ვიტო კოლელიშვილის “კლერმონმა”, უელსში “ოსპრეიზთან” მეორე ტაიმში 7-ქულიან უპირატესობა გაანიავა, 13:21 დამარცხდა (VIDEO) და მეოთხედფინალში გასვლა სათუო გახადა.
ჩემპიონთა თასის მეორე ჯგუფის ბოლოსწინა ტურის ამ მატჩს 10 ათასამდე მაყურებელი დაესწრო და ფრანგები უდისციპლინობამ დააღალატა. მასპინძლებამ 21-ივე ქულა ფეხით კარში დარტყმებით მოიპოვეს და აქედან 18 ჯარიმიდან გაუშვეს. გარდა ამისა, სტუმრები მოედანზე ორჯერ დარჩნენ 10-10 წუთით კაცნაკლული.
ზირაქაშვილი ტრავმირებულია და განაცხადში ვერ იქნებოდა, ხოლო კოლელიშვილი სასტარტო შემადგენლობაში იყო და 50-ე წუთზე შეცვალეს. მან ეს თამაში ნერვულად ჩაატარა და მე-16 წუთზე, როდესაც უელსელები უტევდნენ, მის მახლობლად მდგარ მთავარ მსაჯ უეინ ბარნსს ხელი უბიძგა (VIDEO). ამ ეპიზოდმა მხოლოდ სიტყვიერი გაფრთხილებით ჩაიარა, მაგრამ 26-ე წუთზე ვიტომ მეტოქე რაქს რომ ჩამოაშორა მერე მას სახეში მუშტი უთავაზა და სინბინით დაისაჯა. სტატისტიკის თანახმად, ის “კლერმონის” შემადგენლობაში ყველაზე ბევრჯერ, 5-ჯერ დაჯარიმდა, რაც 40 წუთისთვის ძალიან ბევრია. სხვა მხრივ მან ბურთი 6-ჯერ მიიღო, 4 მეტრი გაიარა და 3-ჯერ პასი გააკეთა. მის ანგარიშზე 6 ბოჭვაა.
ზევით 3 გადაცემა ვახსენეთ და შეხვედრის ერთადერთი ლელო სწორედ ქართველი ფლანკერის პირველ პასს მოყვა. მე-6 წუთზე მან 9 ნომრის ფუნქციები შეითავასა და მეტოქის 22-ში კამილ ლოპესს უპასა, რომელმაც ხაზი გაჭრა და ლელოში ბურთი უესლი ფოფანას შეყოლა. მორგან პარას ზუსტ გარდასახვას დენ ბიგარმაორი ჯარიმით უპასუხა, მაგრამ შესვენებამდე პარამ ასევე ორი ჯარიმა გაიტანა და “კლერმონი” 13:6 დაწინაურდა.
მეორე ტაიმის “ოსპრეიზის” შემადგენლობაში შეცვლაზე სემ დევისი შევიდა და მისმა ფეხჩუბინობამ მატჩის ბედი გადაწყვიტა. მან ჯარიმით და შემდეგ არეკნით, სხვაობა მინიმუმამდე დაიყვანა, ხოლო დასკვნით 13 წუთში კიდევ 3 ჯარიმა გაიტანა და “კლერმონი” სულაც” პრემიალური ქულის გარეშე დატოვა. ერთ კვირაში ფრანგებმა აუცილებლად უნდა სძლიონ “ბორდოს” და სხვა მატჩების შედეგებს დაელოდნონ, რათა ჯგუფში პირველ ადგილს თუ ვერ შეწვდებიან, საუკეთესო მეორეადგილოსნებში (სამი) მაინც მოხვდნენ.
ჩემპიონთა თასი 2015/2016
II ჯგუფი
V ტური. 15 იანვარი
ოსპრეიზი (უელსი) - კლერმონი (საფრანგეთი) 21:13
16 იანვარი
ბორდო (საფრანგეთი) - ექსეტერი (ინგლისი)
| 1. | ოსპრეიზი (უელსი) | 5 | 3 | 0 | 2 | 121:109 | 16 | |
| 2. | კლერმონი (საფრანგეთი) | 5 | 3 | 0 | 2 | 131:101 | 14 | |
| 3. | ექსეტერი (ინგლისი) | 4 | 2 | 0 | 2 | 88:100 | 10 | |
| 4. | ბორდო (საფრანგეთი) | 4 | 1 | 0 | 3 | 78:108 | 6 |
