საქართველოს ახალგაზრდული ნაკრებისა და ფამაგუსტას “ანორთოსის” აწ უკვე ყოფილი ფეხბურთელი გიორგი აბურჯანია ახლა უკვე ოფიციალურად ტარაგონას “ხიმნასტიკის” წევრია. აღნიშნული ინფორმაცია ესპანური გუნდის ვებგვერდმა ოფიციალურად დაადასტურა.

21 წლის აბურჯანიამ ტარაგონელებთან 2.5-წლიანი კონტრაქტი გააფორმა და შესაბამისად გუნდში 2018 წლის ზაფხულამდე დარჩება. ჯერჯერობით უცნობია თუ რა თანხა გაიღო გიორგის სანაცვლოდ “ხიმნასიტკმა”.

ამ ტრანსფერის შესახებ აქამდეც არაერთხელ დაგვიწერია, თუმცა აქამდე ოფიციალური არ იყო და ახლა თამამად შეიძლება ითქვას, რომ აბურჯანიას კარიერაში ახალი ეტაპი დაიწყო.

გიორგი “ანორთოსისში” 2014 წლის ზაფხულიდან მოყოლებული თამაშობდა და წელიწადნახევრის განმავლობაში ძირითადი შემადგენლობის უცვლელი წევრი გახლდათ. რაც შეეხება “ხიმნასტიკს”, სეგუნდადივიზიონში ამჟამად მეექვსე ადგილზეა 30 ქულით და ლა ლიგაში გადასვლის ერთ-ერთი რეალური კანდიდატია. სხვათა შორის, აბურჯანიას თანაგუნდელი ტარაგონულ გუნდში თბილისის “დინამოს” ყოფილი თავდამსხმელი ჩისკო მუნიოსი იქნება...