მეორე სეზონია საერთაშორისო სტუდენტური ლიგა არსებობს. ტურნირი ამჟამად 12 ქვეყანის (ბელარუსი, ჩინეთი, ხორვატია, ინგლისი, ესპანეთი, საქართველო, ყაზახეთი, ლატვია,რუსეთი, სერბეთი, სლოვენია, უკრაინა) წარმომადგენლებს აერთიანებს. 2013-14 წლების სეზონი საქართველოს ჩემპიონ სტუ-სა და რუსეთის წარმომადგენელ მგუ-ს მატჩით გაიხსნა, რომელსაც თბილისის სპორტის სასახლემ უმასპინძლა. მატჩამდე შედგა სეზონის საზეიმო გახსნა, რომელშიც საქართველოს ტექნიკური უნივერსიტეტის მოცეკვავეთა ანსამბლი მონაწილეობდა. ვაჟ მომღერალთა გუნდმა სტუდენტთა საერთაშორისო ჰიმნი შეასრულა. სპეციალური პრიზებით დააჯილდოვეს რუსი (ივან ედეშკო, სტანისლავ ერიომინი, ჰეინო ენდენი, ალექსანდრე გონჩაროვი) და ქართველი (გურამ მინაშვილი, ლევან მოსეშვილი, ამირან სხიერელი (უფროსი), თამაზ ჩიხლაძე, მედიკო მხეიძე, ნიკოლოზ დერიუგინი, ზურაბ გრძელიძე, ნოდარ ქორქია) კალათბურთელები. სხვადასხვა მიზეზით ღონისძიებას მოსეშვილი, მინაშვილი და ქორქია ვერ ესწრებოდნენ.

შეხვედრაში ბურთი სიმბოლურად მინაშვილმა და ედიშენკომ შეიტანეს. ანგარიში სტუმართა გუნდის წარმომადგენელმა ორქულიანით გახსნა. მალე მათიაშვილს მიეცა ანგარიშის გათანაბრების შანსი, მაგრამ მხოლოდ ერთი საჯარიმო გამოიყენა 1:2.მალე მათიაშვილს სტუ-ს დაწინაურების შანსი მიეცა. ამჯერად რიჩარდმა შანსი ხელიდან არ გაუშვა და თანაგუნდელები 3:2 დააწინაურა. ამის შემდეგ მათიაშვილმა გაილაღა , რომელსაც სტუმრებმა ვერაფერი ვერ მოუხერხეს. “რიჩოს” (მათიაშვილის მეტსახელი) დამსახურებაა, რომ პირველი მეოთხედი სტუ-მ დამაჯერებელი ანგარიშით 18:9 მოიგო. 18-დან, 10 ქულა სტუ-ს მათიაშვილმა მოუტანა. მე-2 მეოთხედის დასაწყისში სტუ-ს  უპირატესობამ 11 ქულას (21:10) მიაღწია. ამის შემდეგ მასპინძლები მოეშვნენ, ხოლო სტუმრები გააქტიურდნენ, რომლებმაც მასპინძელთა ლიდერი მათიაშვილი საიმედოდ ამოკეტეს. აღსანიშნავია, რომ მოსკოველები გამოკვეთილი ცენტრის გარეშე თამაშობდნენ, მაგრამ სტუ-ს ტანმაღალ კალათბურთელებს (მათიაშვილი, ლომინაშვილი, ფხაკაძე) მაინც კარგად მეურვეობდნენ. სტუმრების ლიდერობა მსროლელმა ფიოდორ მარკინმა იკისრა, რომელმაც ამ ფუნქციას თავი კარგად გაართვა და თანაგუნდელებს ყველაზე მეტი 30 ქულა შესძინა. მარკინმა 6-დან 4 სამქულიანი გამოიყენა და ამ მხრივაც საუკეთესო იყო მოედანზე.  აღნიშნული შეხვედრის ბედი მე-4 მეოთხედში გადაწყდა. დროის ეს მონაკვეთი სტუმრებმა 25:17 მოიგეს, შეხვედრაში კი 8 ქულის სხვაობით-  83:75 შეძლეს მეტოქის დამარცხება. სტუ-სა და ქართული კალათბურთის გულშემატკივრებმა თავი შეიძლება იმით ვინუგეშოთ, რომ სტუ-ს ახალი გუნდი ერთი თვეც არაა რაც შეიქმნა და ჯერჯერობით შეუთანმაშებლები არიან.  იმედია, ამ ხარვეზს მალე შეავსებენ და გულშემატკივრებს კარგი თამაშით გაახარებენ. აღსანიშნავია, რომ შეხვედრამ დიდი ინტერესი გამოიწვია. სპორტის სასახლის ტრიბუნების შევსებას ცოტა დააკლდა. 

შეხვედრაში ყველაზე მეტი 30 ქულა მარკინმა დააგროვა. 11 ქულითა და 13 მოხსნით მარკინის თანაგუნდელმა დენის ვოლკონსკიმ კი ორმაგი დუბლი შეასრულა. მასპინძელთა მხრიდან ყველაზე შედეგიანები 17-17 ქულით რევაზ დიდია და რიჩარდ მათიაშვილი იყვნენ. მათიაშვილმა აღნიშნულ ქულებს 15 მოხსნა შემატა და ორმაგი დუბლის ავტორი გახდა. თითოეული გუნდიდან საუკეთესო კალათბურთელებად მარკინი და დიდია დაასახელეს.

სტუ(საქართველო) – მგუ(რუსეთი) 75:83

თბილისი.15 ოქტომბერი. სპორტის სასახლე. საერთაშორისო სტუდენტური ლიგა

სტუ: ღუდუშაური (2), გრძელიძე (7), ანთაძე(4), დიდია (17), მათიაშვილი (17ქ,15მ.), გოგოძე (5), ფხაკაძე (2), ცირეკიძე, ლომინაშვილი(6), ალხანაიძე (13ქ,8მ), ლობჟანიძე, დეკანოიძე (2)

მთავარი მწვრთნელი: ნიკოლოზ დერიუგინი

მგუ: ვოლკონსკი(11ქ. 13მ), მელიქიანი (10), ნოვიკოვი (8), კუროჩკინი (10), მარკინი(30), სტრეკინი(6), დემენტიევი (7), გორბანი, ვასილენკო (10)

მთავარი მწვრთნელი: ალექსანდრ პავლენკო

კომისარი: დრაბიკოვსკი (უკრაინა)

მსაჯები: პონომარენკ, ამბროსოვი (ორივე უკრაინა)