როგორც იცით, როინ კვასხვაძე ამ ზამთარს "ზესტაფონიდან" ქუთაისის "ტორპედოში" გადავიდა, თუმცა აღმოჩნდა, რომ ჯერ კონტრაქტი არ გაუფორმებია. უბრალოდ, გუნდთან ერთად ვარჯიშობს. "მსოფლიო სპორტი" 24 წლის მეკარეს ესაუბრა:

- ჯერ არაა გადაწყვეტილი "ტორპედოში" ჩარიცხვა. მოლაპარაკებები იქნება და უნდა შევთანხმდეთ. ალბათ, დავრჩები "ტორპედოში".

- რაზეა დამოკიდებული?

- ჯერ კლუბის ხელმძღვანელობა არაა ჩამოყალიბებული, ვის რა პირობებს შესთავაზებენ. ბიუჯეტის დამტკიცებას ელიან. 

- "ზესტაფონიდან" წასვლის მიზეზი რა იყო?

- 8 წელი ვიყავი "ზესტაფონში", კონტრაქტი დამიმთავრდა და სიმართლე გითხრათ, მქონდა სურვილი, რომ განახლებულიყო. თუმცა, ახალი კონტრაქტის პირობებზე ვერ შევთანხმდით.

- მიმდინარე სეზონს როგორ შეაფასებთ თქვენთვის?

- "ზესტაფონში" მთლად დალაგებული სიტუაცია ვერ იყო, რადგან ბევრი ფეხბურთელი შეიცვალა. ფაქტობრივად, ახალი გუნდი გაკეთდა. შემდეგ, გია გეგუჩაძე როცა მოვიდა, გამოსწორდა სიტუაცია. ახლა უფრო კარგი გუნდია "ზესტაფონი".

- პირადად თქვენს თამაშს როგორ შეაფასებთ?

- კმაყოფილი არ ვარ. უკეთ შემეძლო. ვფიქრობ, ბოლო ტურებში უფრო ვიყავი ფორმაში.

- ნაკრებში ხშირად გიძახებენ, თუმცა თამაში იშვიათად გიწევთ.

- ალბანეთთან გასვლაზე და ესპანეთთან შინ შეცვლაზე ვითამაშე. ჩვეულებრივი რამ არის კონკურენცია და არ მწყინს.