უკვე ერთი წელია, რაც ვეტერანი ესპანელი თავდამსხმელი რაული გელზენკირხენის “შალკეში” აღარ ირიცხება, მაგრამ გერმანულ კლუბთან გამოსამშვიდობებელი მატჩი ახლაღა გამართა და დუბლი მიითვალა.

36 წლის ფეხბურთელი გასული სეზონის წინ ყატარის “ალ-სადში” გადავიდა, შაბათს ყატარელები გერმანიას ესტუმრნენ და “შალკეს” საშინაო არენაზე მასპინძლებთან ამხანაგური მატჩი გამართეს. ესპანელი პირველი ტაიმში “ალ-სადის” შემადგენლობაში თამაშობდა, ხოლო მეორე ნახევარში მასპინძელთა რიგებში გადაინაცვლა.

“შალკემ” ყატარელებს 9:0 სძლია და რაულმა დუბლი მიითვალა. მან გოლები 65-ე და 70-ე წუთებზე გაიტანა. მატჩის მიწურულს, როდესაც ის შეცვალეს, ტრიბუნაზე შეკრებილმა 62 ათასმა მაყურებელმა ესპანელი აპლოდისმენტებით გააცილა.

22 აგვისტოს რაულისა და “ალ-სადის” მონაწილეობით კიდევ ერთი საინტერესო შეხვედრა გაიმართება. ამ დღეს ყატარული კლუბი “სანტიაგო ბერნაბეუზე” მადრიდის “რეალს” ეთამაშება, რომლის შემადგენლობაშიც ვეტერანმა ფორვარდმა 16 წელიწადი გაატარა. რაული ამჯერად ორივე გუნდის შემადგენლობაში თითო-თითო ტაიმს ჩაატარებს. რაული “სამეფო კლუბის” რეკორდსმენია გატანილი გოლების რაოდენობით. მის ანგარიშზე 323 ზუსტი დარტყმაა.