გერმანიის II ბუნდესლიგაში "ჰერტამ" გასვლაზე 3:2 აჯობა "ზანქტ პაულის". მიუხედავად იმისა, რომ ბერლინელებმა წინა ტურში იზეიმეს ბუნდესლიგის საგზურის განაღდება, მასპინძლებთან მოშვებულნი არ გავიდნენ. ლევან კობიაშვილმა კი შეუცვლელად ითამაშა და საგოლე პასიც გააკეთა - თანაც, ბოლო წუთზე.

"კობიმ" მარცხნიდან ჩააწოდა და სანდრო ვაგნერმა ბრწყინვალე დარტყმით გამარჯვება მოუტანა დედაქალაქელებს.

(ვიდეო: https://www.youtube.com/watch?v=GD4O6lo0dw4)

"ზანქტ პაულიში" არ უთამაშია აკაკი გოგიას - განაცხადში გახლდათ.   

ჰოლანდიის ერედივიზიონში არნემის "ვიტესმა" შინ იოლად აჯობა აუტსაიდერ "ვილემ II"-ს - 3:1. მასპინძლები 3 ბურთით იგებდნენ და ბოლოს გაუშვეს. გურამ კაშიამ შეუცვლელად ითამაშა და ყვითელი ბარათიც მიიღო. ვაკო ყაზაიშვილი კი განაცხადში არ ყოფილა.

"ვიტესი" მე-4 ადგილზეა, წინ კი 3 ტურიღაა დარჩენილი. არნემელები 6 ქულით ჩამორჩებიან ლიდერ "აიაქსს" და 2 ქულით - პსვ-სა და "ფეიენოორდს".