18 ივლისს, ვაკეში, მიხეილ მესხის სახელობის სტადიონზე, ევროპის ლიგის მეორე საკვალიფიკაციო ეტაპზე, გორის “დილა” დანიურ “ოლბორგს” უმასპინძლებს. თურქული შეკრებიდან დაბრუნების შემდეგ, გიორგი დევდარიანის შეგირდებმა 2 დღე დაისვენეს და 13 ივლისიდან საგურამოს ბაზაზე განაგრძეს მზადება. მწვრთნელების თქმით, გუნდში საბრძოლო განწყობაა და ტრავმირებულებიც არ არიან. ამ დღეებში, გორულ კლუბში კიდევ 2 მნიშვნელოვანი მოვლენა მოხდება. სამშაბათს ისინი ტექნიკურ სპონსორ “სალერთან” გააფორმებენ ხელშეკრულებას სრული პაკეტით, პრეზენტაცია ფირმის ოფისში, 14 საათზე გაიმართება. სავარაუდოდ ოთხშაბათს კი, “დილას” გენერალური სპონსორი, კერძო კომპანია გახდება. საბიუჯეტო კლუბების შემთხვევაში, ეს საქართველოში პირველი პრეცენდენტია. ამ საკითხზე ბევრი იმუშავეს კლუბის მენეჯერმა გია ისიანმა და “დილას” სხვა ხელმძღვანელებმა. არ არის გამორიცხული, “ოლბორგთან” მატჩში გორელებმა, უკვე ახალი გენერალური სპონსორის სატიტულო წარწერიანი მაისურებით ითამაშონ. ფირმის სახელს კი, პრეზენტაციამდე, ისინი გულშემატკივრებისთვის სიურპრიზად ტოვებენ. 18 ივლისს “ოლბორგთან” მატჩი, 18 საათზე დაიწყება.