ლონდონის ოლიმპიური თამაშებისა და ევროპის ჩემპიონ ლაშა შავდათუაშვილის დებიუტი ახალ წონით კატეგორიაში – 73 კილოგრამში წარუმატებელი გამოდგა. ქართველმა ძიუდოისტმა დიუსელდორფის გრან პრიზე მხოლოდ ერთი შეხვედრა ჩაატარა – შეჯიბრებაში მეორე წრიდან ჩაერთო და ამერიკელ ნიკლას დელპოპოლოსთან უილეთო შეხვედრაში გაფრთხილებებით (0:2) წააგო.

შაბათს გერმანულ ტატამზე მედლები 81 კილოგრამშიც გათამაშდა. საქართველოს სახელით კონკურენციაში უშანგი მარგიანი ჩაერთო. შავდათუაშვილის მსგავსად მანაც მეორე წრით და უილეთო შეხვედრით დაიწყო, ოღონდ იმ განსხვავებით, რომ სამი შიდოდან ორი მარგიანის მეტოქეს, პორტუგალიელ კარლოს ლუზს ერგო. მერვედფინალში ქართველმა ძიუდოისტმა კუბელ ივან ფელიპე სილვა მორალესს ორ წუთში მოუმთავრა საქმე, მაგრამ სულ ეს იყო, რაც გრან პრიზე შეძლო - ოქრო-ვერცხლისთვის ბრძოლის გაგრძელების შანსი ამერიკელ ტრევის სტევენსთან სუფთად წაგებით დაკარგა. რეპეშაჟის ნახევარფინალში კი რუსეთის ნაკრების წევრ სირაჟუდინ მაგომედოვთან ასევე იპონით წააგო და ტურნირი მე-7 ადგილით ჩაამთავრა.

73 კილოგრამ წონით კატეგორიაში პოდიუმის უმაღლეს საფეხურზე იაპონელი ჰიროუკი აკიმოტო ავიდა. 81 კილოგრამში კი ყველას მარგიანის მომგებმა ტრევის სტივენსმა აჯობა.

კვირას ჩემპიონ-პრიზიორები დარჩენილ სამ წონაში: 90, 100 და +100 კილოგრამებში გამოვლინდებიან. საქართველოს დროშის ქვეშ იჭიდავებენ: ზვიად გოგოჭური, ბექა ღვინიაშვილი (ორივე 90 კგ), ალექსანდრე მსხალაძე, ნოდარ მეტრეველი (100 კგ), ადამ ოქრუაშვილი და ლევან მატიაშვილი (ორივე +100 კგ).

გოგოჭური ტურნირში მეორე წრიდან ჩაერთვება. იქამდე კი მასთან დასაჭიდებლად ერთმანეთს უზბეკი კამოლოდინ ხოლმამატოვი და არაბეთის გაერთიანებული საემიროების მოლდოველი წევრი მიხაილ მარკიტანი დაუპირისპირდებიან. ღვინიაშვილი გრან პრის გერმანელ აარონ ჰილდებრანდთან დაჭიდებით გახსნის, მსხალაძე - იაპონელ ტაცუკი მასუბუჩის შეხვდება, მეტრეველი - გერმანელ დინო პფაიფერს, მატიაშვილი - კუბელ ოსკარ ბრისონს, ოქრუაშვილი კი გერმანელ პიერ ბორკოვსკისა და სლოვენიელ მატიას სერაჟს შორის საუკეთესოს.

ძიუდო

დიუსელდორფის გრან პრი

22 თებერვალი

73 კგ

1 ჰიროვუკი აკიმოტო (იაპონია)

2 საგი მუკი (ისრაელი)

3 როკ დრაკშიჩი (სლოვენია)

3 მუსა მოგუშკოვი (რუსეთი)

81 კგ

1 ტრევის სტივენსი (აშშ)

2 სვენ მარეხი (გერმანია)

3 შუხატიონ არსლანოვი (უზბეკეთი)

3 ალექსანდრ ვიეჟერზაკი (გერმანია)

7 უშანგი მარგიანი (საქართველო)