გორის “დილას” ევროპის ლიგის საკვალიფიკაციო ეტაპზე შარშანდელივით დანიური გუნდი შეხვდა. მაშინ “ორჰუსი” იყო, წლეულს - “ოლბორგი”. “ორჰუსის” ბარიერი შიდაქართლელებმა წარმატებით დაძლიეს, ორივე თამაში მოუგეს (2:1, 3:1) და შემდგომ ეტაპზე გავიდნენ. “ოლბორგი” კი შარშან მეორე ეტაპიდან ჩაერთო ევროპის ლიგის გათამაშებაში, სადაც ჩეხურ “სლავიასთან” დამარცხდა (0:0, 1:3). დანიის ბოლო ჩემპიონატში მე-5 ადგილი დაიკავა. საერთოდ კი ქვეყნის 3-გზის ჩემპიონი და თასის 2-გზის მფლობელია.

“ოლბორგისთვის” ყველაზე დასამახსოვრებელი ევროსეზონი 2008-09 წლებისა იყო. მაშინ გუნდი ჩემპიონთა ლიგის ჯგუფურ ეტაპზე მოხვდა. მისი მეტოქეები შოტლანდიური “სელტიკი”, ინგლისური “მანჩესტერი” და ესპანური “ვილიარეალი” იყვნენ და დანიელთა სასახელოდ უნდა ითქვას, რომ მათ 3 მატჩი ფრედ ითამაშეს, 3 წააგეს და საბოლოოდ მე-3 ადგილი დაიკავეს. შემდეგ ევროპის ლიგაზე გადაინაცვლეს, სადაც ესპანური “დეპორტივო” გაიარეს და მერე “მანჩესტერ სიტისთან” პენალტების სერიაში დამარცხდნენ.

ამჟამად გუნდის მთავარი მწვრთნელი 51 წლის კენტ ნილსენია. ზაფხულში “ოლბორგის” მთავარმეგოლე ნიკლას ჰელენიუს იენსენი (რომელმაც შარშან ჩემპიონატში 16 გოლი გაიტანა) ბირმინგემის “ასტონ ვილაში” გადავიდა. ახლა კი ლიდერებად 21 წლის ნახევარმცველი კასპერ კუსკ ვანგსგორი და 25 წლის მცველი ლასე ნილსენი მიიჩნევიან.

პირველი მატჩი 18 ივლისს თბილისში გაიმართება, საპასუხო კი, 25 ივლისს ოლბორგის “ნორდისკე არენაზე”, რომელიც 13800 მაყურებელს იტევს.