საქართველოს საკალათბურთო ნაკრების წევრი მიხეილ ბერიშვილი (სიმაღლე 205 სმ.) სლოვენიის უმაღლესლიგელ “ზლატოროგში” ჩაირიცხა და ახალი გუნდის მაისურით პირველივე საკონტროლო მატჩში თავი ჩინებულად წარმოაჩინა.

27 წლის ქართველმა ფორვარდმა გასული სეზონი “არმიაში” გაატარა და 22 მატჩში მისი საშუალო მონაგარი 10.4 ქულა, 5.5 მოხსნა, 3.1 პასი და 1.1 ჩაჭრა გახლდათ, ახლა კი, თავის გამოჩენის შანსი სლოვენიაში მიეცემა.

როგორც აღვნიშნეთ, ბერიშვილმა ლაშკოელთა მაისურით პირველი თამაში უკვე ჩაატარა. ასევე უმაღლესლიგელ შოშტანის “ელექტრასთან” მატჩში “ზლატოროგმა” 97:72 (30:23, 19:20, 23:16, 25:13) იმარჯვა, ქართველმა ფორვარდმა კი 19 ქულა ჩააგდო და თანაგუნდელთაგან მხოლოდ სლოვენიელ ცენტრ ტრატნიკს (25) ჩამორჩა.

საინტერესოა, რომ ცნობილ პორტალ ”ევრობასკეტს” ბერიშვილი ლაშკოელთა სასტარტო ხუთეულში ჰყავს შეყვანილი, სადაც მის გარდა, ხსენებული ტრატნიკი, ბოიან იოვანოვიჩი, მიჰა ლაპორნიკი და გორან იურაკი შედიან.

ცნობისთვის, გასულ სეზონში “ზლატოროგმა” სლოვენიის ჩემპიონატი მე-5 ადგილზე დაასრულა, მეოთხედფინალში კი “ჰოპსი პოლზელასთან” 1:2 წააგო. სლოვენიაში მომდევნო სეზონი სტარტს 11 ოქტომბერს აიღებს, ლაშკოელთა პირველი მეტოქე კი სწორედ ხსენებული “პოლზელა” იქნება.