როგორც უკვე ვიუწყებოდით, 8-15 სექტემბერს მალტა 1996-1997 წლებში დაბადებულ წყალბურთელ ვაჟთა ევროპის ჩემპიონატის ფინალურ ეტაპს უმასპინძლებს და 16 მონაწილეს შორის საქართველოს ნაკრებსაც ვიხილავთ.

სერბი სპეციალისტის იოვან პოპოვიჩის შეგირდებმა ფინალში თამაშის უფლება მიმდინარე წლის მაისში თბილისში გამართულ შესარჩევ ტურნირზე მოიპოვეს, როდესაც მოლდოვას (16:6), სლოვაკეთს (13:5) და ჰოლანდიას (10:9) სძლიეს, გერმანიასთან კი ფრედ (7:7) ითამაშეს და ჯგუფში პირველი ადგილი არავის დაუთმეს.

სხვათა შორის, ქართველ წყალბურთელებს გერმანელებთან ჭიდილი ფინალურ რაუნდში მოუწევთ, მათ გარდა კი, D ჯგუფში მეტოქეებად იტალია და უნგრეთიც ეყოლებათ. 8 სექტემბერს ქართველები გერმანიას ეთამაშებიან, 9-ში – უნგრეთს, ხოლო 10-ში – იტალიას.

ტურნირის ფორმატის თანახმად, ჯგუფების გამარჯვებულები მეოთხედფინალში პირდაპირ გავლენ, მეორე-მესამეადგილოსნები კი დარჩენილი 4 საგზურისთვის იბრძოლებენ.

აქვე ვთქვათ, რომ საქართველოს ნაკრები მომავალი ტურნირისთვის თბილისში ემზადება, თვის ბოლოს კი საწვრთნელი შეკრების და ტესტ-მატჩების ჩასატარებლად ჩერნოგორიას მიაშურებს, საიდანაც პირდაპირ მალტას ესტუმრება.

ევროპის ჩემპიონატი წყალბურთში 17-წლამდელთა შორის. მალტა. 8-15 სექტემბერი

A ჯგუფი: ხორვატია, სერბეთი, რუსეთი, ბელარუსი.

B ჯგუფი: ესპანეთი, მალტა, საფრანგეთი, თურქეთი.

C ჯგუფი: საბერძნეთი, რუმინეთი, ჩერნოგორია, უკრაინა.

D ჯგუფი: იტალია, უნგრეთი, საქართველო, გერმანია.