დანიის სუპერლიგის მე-15 ტურში ლადო დვალიშვილმა გაიტანა, თანაც გადამწყვეტი გოლი. "ოდენსემ" შინ 1:0 სძლია "ნორდსიელანდს" და ქართველმა ფორვარდმა 34-ე წუთზე ახლოდან, დასწრებაზე თამაშისას მოახერხა გატანა. ეს მისი მესამე გოლია ამ სეზონში. ლადო სასტარტოში იყო და 66-ე წუთზე გაიყვანეს. "ოდენსე" ბოლოდან მესამე ადგილზეა.

უკრაინაში სანდრო კობახიძის "ვოლინმა" გასვლაზე 2:1 სძლია დონეცკის "მეტალურგს" და მეექვსე ადგილზეა. კობახიძემ სრულად ითამაშა და ორჯერ საგოლე შანსიც ჰქონდა, თუმცა მეკარემ აუღო.

აზრბაიჯანში კვლავ მოიგო გიორგი ჩიხრაძის გაწვრთნილმა "სიმურგმა", კერძოდ, დორინელ მუნტიანუს "გაბალას" გასვლაზე 3:2 აჯობა და მეოთხე ადგილზეა.

იტალიის სერია ა-ში "ემპოლიმ" გასვლაზე 2:0 დაამარცხა "პარმა" და მე-13 ადგილზეა. ლევან მჭედლიძემ 90 წუთი სათადარიგოთა სკამზე გაატარა, ხოლო ირაკლი შეყილაძე განაცხადში არ იყო.