ქართველი  სპორტსმენები, წონის მიუხედავად (მსუბუქი, საშუალო თუ მძიმე) უმეტესად მძიმედ დარბიან, რაც იწვევს ნაადრევ დაღლას და სახსრების, კუნთების, მყესებისა და შინაგანი ორგანოების სერიოზულ დაზიანებას. ჩემთვის სპორტი და ჯანმრთელობა  განუყოფელი მცნებებია. ამიტომაც შევქმენი სირბილის სწავლების თანამედროვე მეთოდიკა  „47+5“. უცხოეთიდან ხშირად მიკავშირდებიან ჩვენი თანამემამულეები და ინტერესდებიან  პრაქტიკული რჩევებით. ეს სტატია მათი დახმარების პირველი მცდელობაა. გთავაზობთ  სირბილის ოთხ ელემენტს, რომელთა ათვისების შემდეგ, სირბილი უფრო სასიამოვნო  გახდება, ფიზიკური კონდიციების მომატებასთან ერთად, გაგიუმჯობესდებათ ჯანმრთელობა და ტრავმებისკენ მიდრეკილება შეგიმცირდებათ.

1. სირბილის  დროს,  ყველაზე  ხშირია  ქუსლის  არასწორად  გამოყენება.  ქუსლები  სასურველია  საერთოდ  დავივიწყოთ  და  ვირბინოთ  მხოლოდ  ტერფებით.  ეს  საშუალებას  მოგვცემს  მაქსიმალურად  გამოვრიცხოთ  ტრავმები (ქუსლის, კოჭის,  მუხლის, აქილევსის  მყესის და  ხერხემლის),  საგრძნობლად  გავაუმჯობესოთ  სისწრაფე  და  ამტანობა.

2. რაც  შეეხება  ტერფით  სირბილს,  აუცილებელია  ვისწავლოთ  ტერფის  გრუნტთან  სწორად  შეხება.  ამისათვის  საჭიროა  დავუკვირდეთ,  ტერფი  ნეკისკენ  უფრო  მეტად  იდგმება  თუ  ცერისკენ.  უმეტეს  შემთხვევაში  იდგმება  გარეთ,  ე. ი.  ნეკისკენ,  რაც  თითების  ჩონჩხის  დაზიანებას  იწვევს.  საჭიროა  მივეჩვიოთ  ტერფის  მთლიანად  დადგმას. 

3. შემდეგი  შეცდომა  ტერფების  ერთმანეთის  მიმართ  არასწორად  განთავსებაა.  უმეტეს  შემთხვევაში  ქუსლები  უფრო  ახლოს  იდგმება,  ვიდრე  ცერა  თითები.  ასე  განთავსების  შემთხვევაში  ენერგიის  დიდი  ნაწილი  ფუჭად  იხარჯება,  რადგან  გრუნტს  ჯერ  ნეკით  ვეხებით,  შემდეგ  მთლიანი  ტერფით  და  ბოლოს  ვაკეთებთ  არეკლვას.  ტერფების  პარალელურობა  3  მოძრაობის  1  მოძრაობით  შეცვლას  იწვევს  და  საშუალებას  გვაძლევს  დავზოგოთ  როგორც  დრო,  ისე  ენერგია,  რაც  სისწრაფეს  ბუნებრივად  ზრდის  და  შემდეგი  ელემენტის  უფრო  ადვილად  დამორჩილებაში  გვეხმარება. 

4. ფეხი  თავისუფლად  მოძრაობის  დროს  გარეთ  გადის,  ამიტომ  ჰორიზონტალურ  ოვალს  ხაზავს.  ორ  წერტილს  შორის  უმოკლესი  მანძილი  კი  არის  სწორი  ხაზი.  ამიტომ  საჭიროა  ფეხი  სწორ  ხაზზე  ვამოძრაოთ.  ეს  დაგვაზოგინებს  ენერგიას  და  მოგვიმატებს  სისწრაფეს.

პროფესიონალი  სპორტსმენებისათვის  „47+5“  მეთოდის  სრული  კურსი  შედგება  კიდევ  49  ელემენტისგან.  მოყვარულებისთვის  კი  ეს  4  ელემენტი  სრულიად  საკმარისია,  რომ  ირბინონ  მსუბუქად  და  არ  დაიზიანონ  ჯანმრთელობა.  ფეხბურთელებისთვის  შექმნილი  ეს  მეთოდი  მაქსიმალური  შედეგის  გარანტიას  იძლევა.  საწყისი  4  ელემენტი  საშუალო  ფიზიკურ  ფორმაში  ჩაგაყენებთ,  რაც  2  ტაიმის ბოლომდე  გაძლებას  გაგიადვილებთ.  ვისაც  გსურთ  ჩემი  მეთოდის  შესახებ  უფრო  მეტის  გაგება,  გუგლში  ჩაწერეთ  -  ფიზმომზადება  დატვირთვის  გარეშე  და  წაიკითხეთ  ინტერვიუები,  ან  უყურეთ  დოკუმენტურ  ვიდეომასალას,  რაც  ამ  მეთოდით  მიღწეული  ძნელად  დასაჯერებელი  შედეგების  რეალურობაში  უფრო  ადვილად  დაგარწმუნებთ.  

„მსოფლიო  სპორტი“  ყოველთვის  ცდილობდა  -  ფიზმომზადება  დატვირთვის  გარეშე  „47+5“  მეთოდის  პოპულარიზაციას,  რისთვისაც  რედაქციის  ყველა  წევრს  დიდ  მადლობას  ვუხდი.

გუჯა კახაძე

®