იტალიის სერია A-ს 30-ე ტურში "ნაპოლიმ" "მილანი" დაამარცხა და "ინტერს" უპირატესობის გაზრდის საშუალება არ მისცა.

მატჩი ანტონიო კონტეს გუნდმა შესანიშნავად დაიწყო, „მილანის“ დაცვის ხაზმა კი - კატასტროფულად. მეორე წუთზე ანგარიში მატეო პოლიტანომ გახსნა, ხოლო მე-19 წუთზე რომელუ ლუკაკუმ სხვაობა გააორმაგა. ორივე შემთხვევაში „როსონერის“ დაცვის მოქმედება უბრალოდ კრიტიკას ვერ უძლებდა.

ანტონიო კონტეს გუნდი თითქოს, მშვიდად იგებდა, მაგრამ მეორე ტაიმის შუა ნაწილიდან „მილანმა“ მოახერხა გამოცოცხლება. ჯერ პენალტის დარტყმის უფლება მოიპოვა, რომელიც სანტიაგო ხიმენესმა უხეიროდ შეასრულა და მას ალექს მერეტმა აჯობა. 84-ე წუთზე სერჟიო კონსეისაოს გუნდმა მაინც გაიტანა, სხვაობა ლუკა იოვიჩმა შეამცირა. დარჩენილ დროში სტუმრება გაიბრძოლეს, მაგრამ ვერაფერი შეცვალეს და მარცხი განიცადეს.

„ნაპოლი“ 64 ქულით მეორე ადგილზეა, მხოლოდ 3 ქულით ჩამორჩება „ინტერს“ და ჩემპიონობისთვის ბრძოლას აგრძელებს, ხოლო მომდევნო ტურში 7 აპრილს, სტუმრად „ბოლონიას“ შეხვდება. „მილანი“ 47 ქულით მხოლოდ მეცხრე პოზიციაზეა, და 5 აპრილს, „ფიორენტინას“ უმასპინძლებს.

„ნაპოლი“ – „მილანი“ 2:1 (2:0)

გოლები: 1:0 პოლიტანო (2), 2:0 ლუკაკუ (19), 2:1 იოვიჩი (84)