2025 წლის ზაფხულის სანაკრებო ფანჯარაში, ბორჯღალოსნები სამხრეთ აფრიკაში ორკვირიან ტურნეში გაემგზავრებიან და მსოფლიოს ჩემპიონთან ტესტ-მატჩამდე ადგილობრივ ფრენჩაიზს, ‘ტოიოტა ჩიტასს’ შეერკინებიან.

შეხვედრა 12 ივლისს ბლუმფონტეინში, „ტოიოტა სთედიუმზე“ გაიმართება. შეგახსენებთ, პრაქტიკულად გადაწყვეტილია და მცირე დეტალების შეთანხმების შემდეგ საბოლოოდ დადასტურდება, რომ 5 ივლისს საქართველოში ირლანდიას დავუხვდებით, სამხრეთ აფრიკას კი 19 ივლისს ნელსპრუიტში, „მბომბელას“ სტადიონზე ვეწვევით.

„‘ჩიტასთან’ თამაში მშვენიერი შესაძლებლობაა ‘ბოკესთან’ ტესტ-მატჩისთვის მოსამზადებლად, ბლუმფონტეინი და „ტოიოტა სთედიუმი“ კი შესანიშნავი ადგილი რაგბის სათამაშოდ. მოხარულები ვართ, რომ საკუთარი თავის გამოცდა უდიდეს სარაგბო ქვეყანასთან მოგვიწევს“ - განაცხადა ბორჯღალოსნების მთავარმა მწვრთნელმა რიჩარდ კოკერილმა.

‘ჩიტასი’ 1895 წელს დაარსდა. ის მონაწილეობს ქვეყნის შიდა ჩემპიონატ ქარი ქაფში, რომლის ჩემპიონი ჯამში 7-ჯერ გახდა, 9-ჯერ მეორე, ხოლო 14-ჯერ მესამე ადგილზე გავიდა. 7 ჩემპიონობიდან 5 უკანასკნელ 20 წელზე მოდის. ‘ტოიოტა ჩიტასმა’ თასი ბოლოს 2023 წელს შემართა.

გარდა ამისა, ‘ჩიტასი’ 2006-2017 წლებში სუპერ რაგბიში თამაშობდა, 2017 წლიდან კი ჩრდილოეთ ნახევარსფეროში გადმოინაცვლა და გაერთიანებულ რაგბის ჩემპიონატში, იმხანად პრო 14-ში ჩაერთო, თუმცა 2020 წლის შემდეგ კოვიდ-პანდემიამ მათ ამ ტურნირში მონაწილეობის შესაძლებლობა არ მისცა. 2022 წელს, ევროპის პროოფესიულმა საკლუბო რაგბიმ, ‘ჩიტასი’ ‘შავ ლომთან’ ერთად ჩელენჯ თასზე მიიწვია და მას შემდეგ წვეული გუნდის სახით ევროტურნირების მონაწილეა.

‘ჩიტასის’ საშინაო არენა „ტოიოტა სთედიუმი“ 1955 წელს აშენდა, ორჯერ ჩაუტარდა რეკონსტრუქცია და დღესდღეისობით 42 ათას მაყურებელს იტევს. 1995 წლის მსოფლიო თასზე მან მსოფლიო თასის სამ შეხვედრას უმასპინძლა, 2010 წელს კი, საფეხბურთო მსოფლიო ჩემპიონატის 6 თამაში გაიმართა.