ევროპის ჩემპიონატის მეოთხე დღე D ჯგუფის მეორე მატჩით დაიხურა, სადაც ტურნირის ერთ-ერთმა მთავარმა ფავორიტმა, საფრანგეთმა ავსტრია მინიმალური სხვაობით დაამარცხა.

შეხვედრა საფრანგეთის აქტიურობით დაიწყო და მალევე კილიან მბაპეს სახიფათო მომენტიც შეექმნა, თუმცა უკვე „რეალ მადრიდის“ შემტევმა ავსტრიელთა მეკარის, პენცის დაჯაბნა ვერ მოახერხა.

თავის მხრივ, ავსტრიელებსაც ჰქონდათ საკუთარი მომენტი, როდესაც ბაუმგარტნერი მაიკ მენიოსთან ერთი-ერთზე დარჩა, თუმცა ვერც მან მოახერხა გოლის გატანა და ეს გაცუდებული მომენტი ავსტრიის ნაკრებს ძვირად დაუჯდა.

ძალიან მალე, 38-ე წუთზე კილიან მბაპემ მარჯვენა ფლანგზე იაქტიურა და საჯარიმოში ჩააწოდა, ბურთზე პირველი მაქსიმილიან ვიობერმა ითამაშა, თუმცა მისდა სამწუხაროდ, ბურთი საკუთარ კარში ჩაჭრა და ანგარიშიც გაიხსნა - 0:1.



მეორე ტაიმიც საფრანგეთის აქტიურობით დაიწყო. 55-ე წუთზე კილიან მბაპე მეკარესთან ერთი-ერთზე დარჩა, თუმცა ძალიან რეალური მომენტი ვერ გამოიყენა.

თავიანთი მომენტები ანტუან გრიზმანს და მარკუს ტურამსაც ჰქონდათ, თუმცა შეხვედრაში ანგარიში აღარ შეცვლილა და საფრანგეთმა პირველი 3 ქულა მოიპოვა.

მატჩის ბოლოს „ლე ბლუს“ ერთი არასასიამოვნო მომენტიც შეემთხვა. კილიან მბაპეს შეჯახების შემდეგ ცხვირიდან სისხლდენა დაეწყო და შეხვედრის გაგრძელება ვეღარ შეძლო.

საფრანგეთის ნაკრები მომავალ მატჩს 21 ივნისს, ნიდერლანდების წინააღმდეგ ჩაატარებს, შესაბამისად, ავსტრიის მეტოქე კი იმავე დღეს პოლონეთი იქნება.

ევრო 2024-ზე მომდევნო მატჩი კი ჩვენთვის უმნიშვნელოვანესია. საქართველოს ნაკრები სადებიუტო შეხვედრას თურქეთის წინააღმდეგ 20:00 საათზე, დორტმუნდში ჩაატარებს.

ავსტრია 0:1 საფრანგეთი

ვიობერი (ავტოგოლი) (38)

მერკურ შპილ-არენა - დიუსელდორფი

მსაჯი: ხესუს ხილ მანსანო (ესპანეთი)

ავსტრია (4-2-3-1): პენცი - პოში, დანზო, ვიობერი (ტრაუნერი - 59), მვენე (პრასი - 88) - ზაბიცერი, ზაივალდი - ლაიმერი (შმიდი - 90+2), ბაუმგარტნერი, გრილიჩი (ვიმერი - 59) - გრეგორიჩი (არნაუტოვიჩი - 59).

საფრანგეთი (4-3-3): მენიო - კუნდე, უპამეკანო, სალიბა, ტ. ერნანდესი - კანტე, რაბიო (კამავინგა - 71), გრიზმანი (ფოფანა - 90) - დემბელე (კოლო მუანი - 71), ტურამი, მბაპე (ჟირუ - 90).