დორტმუნდის „ბორუსიას“ გენერალურმა დირექტორმა ჰანს-იოახიმ ვაცკემ განაცხადა, რომ „რეალი“ ფავორიტია, მაგრამ „დორტმუნდმა“ აუტსაიდერის სტატუსით ერთხელ უკვე მოიგო ფინალი.

ვაცკემ იგულისხმა 1997 წელს, ტურინის „იუვენტუსთან“ გამარჯვება და ამ მატჩის შესახებ თქვა:

„იმ საღამოს პირველად და უკანასკნელად მოვიგეთ ჩვენს ისტორიაში ჩემპიონთა ლიგა. „დორტმუნდის“ ტიპური თამაში იყო, რადგან ძლიერ მეტოქეებთან უფრო კარგად ვთამაშობთ, ესაა „დორტმუნდის“ დნმ. ის „იუვე“ დღევანდელი „რეალივით“ იყო, დიდებული გუნდი ჰყავდა. ცოტა გაგვიმართლა, მაგრამ ესეც ფეხბურთის ნაწილია. მაშინ ტრიბუნებზე ვიყავი, როგორც რიგითი გულშემატკივარი, რადგან კლუბში ოდნავ მოგვიანებით დავიწყე მუშაობა.

ცხადია, რომ „რეალი“ ფავორიტია, მაგრამ ახლახან ვნახეთ, რა მოხდა დუბლინში. დარწმუნებული ვარ, რომ „ლევერკუზენი“ „ატალანტასთან“ 10-დან 8 მატჩს მოიგებს, მაგრამ „ატალანტამ“ იმ საღამოს ისე ითამაშა, თითქოს მათ ცხოვრებაში ბოლო თამაში იყო. ჩვენც ასე უნდა ვითამაშოთ. პსჟ ორჯერ დავამარცხებთ თუ იგივე თამაშს ვაჩვენებთ, გავიმარჯვებთ. „რეალს“ არასდროს წაუგია ჩემპიონთა ლიგის ფინალი, მაგრამ ყველაფერი პირველად ხდება“, - თქვა ვაცკემ.

შეგახსენებთ, რომ ჩემპიონთა ლიგის ფინალი, 1-ელ ივნისს, „უემბლის“ სტადიონზე გაიმართება.