საქართველოს ეროვნული ნაკრების ერთკვირიანი შეკრება დასრულდა. ილიას ზუროსმა და მისმა ასისტენტებმა – ანატოლი ბოისამ, მანუჩარ მარკოიშვილმა და ფიზმომზადების მწვრთნელმა, ირაკლი შიოშვილმა ეროვნული ნაკრების გაფართოებული შემადგენლობა ინტენსიურად ავარჯიშეს, რის შედეგადაც 18 კალათბურთელი შეირჩა, რომლებიც 21 ივლისიდან იტალიის ქალაქ ტრევიზოში შეკრების მეორე ეტაპში მიიღებენ მონაწილეობას.
ეროვნული ნაკრების გაფართოებულ შეკრებაზე რეკორდულად ბევრი – 34 კალათბურთელი იყო გამოძახებული. მწვრთნელებმა მოთამაშეები 2 ჯგუფად გაყვეს და დიღმის არენაზე ყოველდღიურად ავარჯიშებდნენ. შეკრებაზე არ იყვნენ თორნიკე შენგელია, თად მაკფადენი, გოგა ბითაძე და სანდრო მამუკელაშვილი. ეს ოთხეული ნაკრებს პირდაპირ ტრევიზოში, 21 ივლისს შეუერთდება. კიდევ ერთი კალათბურთელი, რომელიც ტრევიზოში წამსვლელ 18 კალათბურთელს შორის მოხვდა, ლუკა ლიკლიკაძეა, რომელიც ამჟამად ჩრდილოეთ მაკედონიაში, საქართველოს 20-წლამდელთა ნაკრებში იმყოფება.
18-კაციან შემადგენლობაში არაერთი ახალგაზრდა მოხვდა, რამდენიმემაც მწვრთნელების დიდი მოწონება დაიმსახურა და ისინი ეროვნულ ნაკრებს მომავალში გამოადგებიან. სამწუხაროდ, ოჯახური მიზეზების გამო შეკრებას ბექა ბურჯანაძე გამოაკლდა.
17 და 18 ივლისს ეროვნული ნაკრების წევრები სამედიცინო შემოწმებას გაივლიან და 20 ივლისს იტალიაში გაემგზავრებიან. შეკრება ტრევიზოში 21 ივლისს დაიწყება, სადაც ჩვენი გუნდი 10 დღე ინტენსიურად ივარჯიშებს. იტალიაში ნაკრები 18 კალათბურთელით გაემგზავრება, საიდანაც საბოლოოდ ის 12 მოთამაშე შეირჩევა, რომლებიც მსოფლიოს ჩემპიონატზე, იაპონიაში გასამგზავრებელ შემადგენლობაში მოხვდებიან.
საქართველოს ნაკრების ხელმძღვანელობას შემუშავებული აქვს მოსამზადებელი გეგმა, რომელიც 7 ამხანაგურ მატჩს მოიცავს. იტალიაში, კემპის დასრულების შემდეგ ილიას ზუროსის გაწვრთნილი ნაკრები პირველ მატჩს ტრევიზოშივე, ეგვიპტის ეროვნულ გუნდთან გამართავს, რის შემდეგაც ლიეტუვაში, შემდეგ კი ლატვიაში გაემგზავრება და ამ ქვეყნების ნაკრებებთან შესაბამისად – 1 და 5 აგვისტოს ითამაშებს.
12-13 აგვისტოს თბილისში საერთაშორისო ამხანაგური ტურნირი გაიმართება, რომელშიც საქართველოსთან ერთად მონტენეგრო, იორდანია და ირანი ითამაშებენ. 12-ში ნახევარფინალები: საქართველო – იორდანია და მონტენეგრო – ირანი გაიმართება, ხოლო 13 აგვისტოს ფინალი და მატჩი მესამე ადგილისთვის. ტურნირის დასრულებიდან მეორე დღეს, საქართველო ირანთან დახურული ტიპის სპარინგ-მატჩს გამართავს, რომელსაც მაყურებლები არ დაესწრებიან და ტელევიზიითაც არ გადაიცემა.
17 აგვისტოს საქართველოს ეროვნული ნაკრები 12 კალათბურთელით იაპონიის კუნძულ ოკინავაზე გაემგზავრება.
GBF.GE
კომენტარის გამოქვეყნებისთვის, გთხოვთ გაიაროთ ავტორიზაცია ან რეგისტრაცია
იმედია ტრამვები არ იქნება და ახალი კალათბურთელები გააძლიერებენ ნაკრებს.
მსოფლიოზე გასვლა დიდი წარმატებაა მაგრამ ვინ იყო ჩვენი მთავარი კონკურენტი?! ისლანდია! ამ საკალათბურთო რუკაზე არ არსებულ ქვეყანას ვაჯობეთ სხვა გუნდებთან უკეთესი ჩაგდებული-მიღებული ბურთების სხვაობით! ზუროსი მილტონ ჰეიგის გზას ადგას, მიუხედავად ამისა ოპტიმისტი ვარ და იმედს დავიტოვებ ქართველი კალათბურთელები გაგვახარებენ კარგი თამაშით
გასაგებია რომ კალათბურთის ფედერაცია შეცდომას უშვებს და არ იცის სად და რომელ კუნძულზე მიემგზავრება ეროვნული ნაკრები,მაგრამ რომ აკოპირებთ სტატიას ერთი მაინც გადაიკითხეთ.კუნძული ონიკავა არ არსებობს.მაგ კუნძულს ჰქვია ოკინავა