კვიპროსის თასის მერვედფინალში გიორგი ლორიას და ავთო ებრალიძის „ანორთოსისმა“ „პარალიმნი“ პენალტების სერიაში დაამარცხა და მომდევნო ეტაპზე გავიდა.

ორივე ქართველმა ფეხბურთელმა გამარჯვებაში წვლილი შეიტანა, რადგან ლორიამ პენალტების სერიაში 5-დან 1 დარტყმა მოიგერია. გიორგიმ სტუმართა რიგით მეორე დარტყმა უკუაგდო, რომელიც ალექსანდარ ვუჩენოვიჩმა შეასრულა, ხოლო ებრალიძემ თავისი გუნდის რიგებიდან მეორე პენალტი გაიტანა.

საბოლოოდ, თერთმეტმეტრიანების სერიაში „ანორთოსისმა“ 4:3 მოიგო და მეოთხედფინალში ითამაშებს. შეგახსენებთ, კვიპროსის თასის ამავე ეტაპზე ითამაშებს ნიქოზიის „აპოელი“, რომლის რიგებში გიორგი ქვილითაია, მურთაზ დაუშვილი და ლაშა დვალი თამაშობენ.

ლორიამ მატჩის შემდეგ კომენტარიც გააკეთა: „ყველაფერი შეიძლებოდა მომხდარიყო, რადგან მეტოქე თავს ძალიან კარგად იცავდა. რთული თამაში იყო და ძალიან კარგია, რომ შემდეგ ეტაპზე გავედით. თასი ჩვენი მიზანია, მაგრამ ჩემპიონატშიც უნდა ვიბრძოლოთ. მადლობა მინდა გადავუხადო ყველას, ვინც მხარი დაგვიჭირა. ახლა ამ გამარჯვებით უნდა დავტკბეთ და ხვალიდან მომდევნო მატჩზე ვკონცენტრირდეთ“.