ბერლინის „ჰერტას“ ფელიქს მაგათი გაწვრთნის. გამოცდილმა გერმანელმა სპეციალისტმა დედაქალაქურ კლუბთან კონტრაქტი მიმდინარე სეზონის ბოლომდე გააფორმა.

მაგათმა ტაიფუნ კორკუტი შეცვალა, რომელიც მას შემდეგ დაითხოვეს, რაც „ჰერტას“ ბუნდესლიგაში 9-მატჩიანი მოუგებელი სერია დაუგროვდა და ბოლო 5 თამაში საერთოდ წააგო. შედეგად, ბერლინური კლუბი 23 ქულით გასავარდნ ზონაში, მე-17 ადგილზე დაქვეითდა.

ფელიქს მაგათს 5 წელია მწვრთნელად არ უმუშავია. ბოლოს ის ჩინეთში, „შანდონგ ლუნინგს“ ავარჯიშებდა, ხოლო გერმანიაში უკანასკნელად 2011-2012 წლების სეზონში „ვოლფსბურგის“ თავკაცი იყო.

გერმანელ სპეციალისტს არაერთ გუნდში უმუშავია, მათ შორის „ვერდერში“, „ჰამბურგში“, „შტუტგარტში“, „შალკეში“, „ვოლფსბურგსა“ და „ბაიერნში“. მაგათი 2005, 2006 და 2009 წლებში გერმანიის ჩემპიონი გახდა.