მოსკოვის „ლოკომოტივის“ ქართველი თავდამსხმელის ხვიჩა კვარაცხელიას მომავალი ჯერჯერობით გაურკვეველია. 18 წლის ფეხბურთელი მოსკოვურ გუნდს თებერვალში საიჯარო ხელშეკრულებით შეუერთდა, რომელსაც ვადა მიმდინარე სეზონის დასრულების შემდეგ გასდის.
როგორც ცნობილი გახდა, „რკინიგზელებს“ „რუსთავისთვის“ კონკრეტული წინადადებით ჯერ არ მიუმართავთ. ამის შესახებ ქვემო ქარლთელთა დირექტორმა ბადრი მაჭავარიანმა განაცხადა. მაჭავარიანი მიიჩნევს, რომ ხვიჩას ყველაფერი წინ აქვს და აჩქარება საჭირო არაა. როგორც რუსულ მედიას უთხრა, კვარაცხელიას შეძენის პრიორიტეტი მოსკოვის „ლოკომოტივს“ გააჩნია.
„ვფიქრობ, ხვიჩას მომავალი წინაა. ის ძალიან კარგ შთაბეჭდილებას ტოვებს იმ დროში, რომელსაც ასეთ მეგაკლუბში უთმობენ. ისეთი დიდი პრაქტიკისა და ხედვის გუნდში, როგორც „ლოკომოტივია“, მას ძირითად გუნდთან არ ათამაშებდნენ, პერსპექტივას რომ არ ხედავდნენ. სავსებით რეალურია, რომ კვარაცხელიამ მოსკოვში მაღალ დონეზე ითამაშოს, მთავარია ყველაფერი კარგად იყოს. თუმცა, რა თქმა უნდა, იღბალიც საჭიროა.
„ლოკომოტივიდან“ წინადადებას ველოდებით, რადგან კონკრეტული შემოთავაზებით არ მოუმართავთ. თუმცა, აგვისტომდე დროა და სიჩქარე საჭირო არაა. ვიცი, რომ „რკინიგზელთა“ რიგებში პროფესიონალები მუშაობენ, მჭიდროდ იმუშავებენ ამ საკითხზე და სათანადო გადაწყვეტილებას მიიღებენ.
გამოსასყიდი თანხის ოდენობა? ამის პასუხზე ჯერ ჩამოყალიბებულნი არ ვართ და ამ საკითხზე საუბარი ადრეა.
საიჯარო ხელშეკრულების პირობით გათვალისწინებულია, რომ სხვა გუნდებთან მოლაპარაკებები არ უნდა ვაწარმოოთ. ჩვენ გვაქვს შეთანხმება, რომლის მიხედვითაც პირველ რიგში იქნება „ლოკომოტივი“ და შემდეგ სხვები, ხვიჩას შეძენის პრიორიტეტი მოსკოვურ გუნდს აქვს“, - უთხრა მაჭავარიანმა ТАСС-ს.
შეგახსენებთ, რომ ხვიჩა კვარაცხელია „ლოკომოტივს“ ნელ-ნელა უშინაურდება. გასულ ტურში კი სადებიუტო გოლიც გაიტანა და რუსეთის პრემიერლიგაში პირველი XXI საუკუნეში დაბადებული ფეხბურთელი გახდა, რომელმაც გოლის გატანა შეძლო.
