საქართველოს ფეხბურთის ფედერაციის სადისციპლინო კომიტეტმა გორის “დილასა” და თბილისის “დინამოს” მატჩის შემდგომ მომხდარ ინციდენტზე იმსჯელა და გადაწყვეტილებაც მიიღო. როგორც სფფ-ის პრესსამსახური იტყობინება, “დინამო” გულშემატკივრების მიერ ტრიბუნების დაზიანების გამო 3 ათასი ლარით დაჯარიმდა, ერთ მატჩიანი დისკვალიფიკაციით (უმაყურებლოდ) და სეზონის ბოლომდე პირობით დისკვალიფიკაციით დაისაჯა.

ამასთან, თბილისელთა მთავარი მწვრთნელის ასისტენტი ოთარ გაგნიძე გულშემატკივრების სიტყვიერი შეურაცხყოფისთვის 2 მატჩით და 500 ლარით დაჯარიმდა, ხოლო გორის “დილას” 800 ლარიანი ჯარიმა დაეკისრა.

შეგახსენებთ, ეროვნული ლიგის მეცხრე ტურში, “თენგიზ ბურჯანაძეზე” ადგილობრივ და სტუმარ ქომაგებს შორის დაპირისპირება მოხდა, შედეგად, გორის სტადიონი დაზიანდა.