საქართველოს ეროვნულ ლიგაში ჯერ 10 მატჩი ჩატარდა და აქედან 7 სტუმრებმა მოიგეს. პირველ ტურში 3, ხოლო მეორე ტურში 4 შეხვედრა სტუმრებისა იყო.

ასეთი რამ მართლაც იშვიათობაა, მაგრამ უნდა გავითვალისწინოთ, რომ არაერთი გუნდი საკუთარ მოედანზე, საკუთარ ქალაქშიც კი ვერ თამაშობს. ამიტომაც, ხშირად ნომინალურია ხოლმე სტუმარ-მასპინძლის ცნება.

გასული 10 მატჩიდან ყველაში გაიტანეს გოლი სტუმრებმა. ცხრილს რომ გადავავლოთ თვალი, დავინახავთ, რომ რამდენიმე გუნდმა პირველ ტურში შინ წააგო, მეორეში კი სტუმრად მოიგო და პირიქით.

ოთხჯერ იყო შემთხვევა, რომ გუნდი იგებდა და საბოლოოდ, წააგო. გოლებიც ხშირად გადის: 36 გოლი 10 მატჩში.

ბომბარდირიც უკვე გვყავს “ჩიხურას” თავდამსხმელის, გიორგი გაბედავას სახით. უკვე 4-ჯერ გაიტანა. საგოლე პასებში კი “დილას” ნახევარმცველი დავით რაჟამაშვილი დაწინაურდა – 3.