ლაშა თოთაძემ ბოლო ხუთ მატჩში ხუთი გოლი გაიტანა, თანაც, რა მნიშვნელობის გოლები გააქვს. “ტორპედოსთან”, “ლოკომოტივთან” და ამჯერად გორში “დილასთან” ბოლო წუთებზე შესრულებული დუბლი... 29 წლის მცველის ძლიერად დარტყმული მეკარეებისთვის აუღებელი გახდა.

თბილისის “დინამო” 83-ე წუთამდე აგებდა გორში. მასპინძელთაგან გოლი გიორგი ფანცულაიამ გაიტანა, რომელმაც ლაშა სალუქვაძე დაჯაბნა, მერე კი არცთუ ძლიერად დაარტყა, მაგრამ მეკარე ლიტოვჩენკო შეცდა და 1:0.

მეორე ნახევარში, ბოლო წუთებამდე “დინამოს” მხოლოდ ერთი რეალური შანსი ჰქონდა, როცა ლაშა ქოჩლაძე გავიდა პირისპირ და მიხეილ მუჯრიშვილმა იმარჯვა, ხოლო დამატებაზე ბექა ქავთარაძემ ააცილა.

აი, 83-ე წუთზე კი პენალტი დაინიშნა აკაკი შულაიასა და იმავე ქავთარაძის დამსახურებით. თოთაძემ ზუსტად დაარტყა – 1:1.

დარჩენილ წუთებში ‘დინამო” გააფთრებით უტევდა და ბოლო შანსი ისევ სტანდარტულიდან მიეცა. თოთაძემ 30 მეტრიდან ცხრიანში გაგზავნა ბურთი – 1:2.

“დინამო” კვლავაც ოთხქულიანი ჰანდიკაპით ლიდერობს.

გორი. თენგიზ ბურჯანაძე

ეროვნული ლიგა. 30-ე ტური

დილა (გორი) – დინამო (თბილისი) 1:2 (1:0)

დილა: მუჯრიშვილი, ფოფხაძე, რაზმაძე, წიქარიძე (ნუბიო 76), ნონიკაშვილი, ფანცულაია (მოდებაძე 72), აბუბაქარი (პაპავა 46), კირკიტაძე, კვახაძე, პედრინიო, მორასი

მწვრთნელი: გიორგი დარასელია

დინამო: ლიტოვჩენკო, გეგეჭკორი, სალუქვაძე, თოთაძე, კობოური, ქარდავა, ზარია (ქოჩლაძე 66), შულაია (კუცია 90+1), კიტეიშვილი, მიქელთაძე, ქავთარაძე

მწვრთნელი: კახა კაჭარავა

გოლები: 1:0 ფანცულაია (40), 1:1 თოთაძე (83 პენ), 1:2 თოთაძე (90+3)

გაფრთხილება: კვახაძე – შულაია

მსაჯი: ჯ. ხორავა