კალათბურთი

13:12 | 24.06.2017 | ნანახია [] - ჯერ

3X3 კალათბურთელთა ნაკრები საკვალიფიკაციო ტურნირში მონაწილეობს

საქართველოს 3X3 კალათბურთელთა ეროვნული ნაკრები ევროპის ჯუჯა სახელმწიფო ანდორაში იმყოფება, სადაც 24-25 ივნისს ევროპის თასის ფინალურ ეტაპზე გასასვლელი საკვალიფიკაციო ტურნირი ტარდება. მაშ შემდეგ, რაც 3X3 კალათბურთი ოლიმპიური სახეობა გახდა, მას ყველა ქვეყანა გაძლიერებული ინტერესით ეკიდება. შესაბამისად, სპორტის ამ სახეობის საერთაშორისო ტურნირებზე მონაწილეთა დონე და კლასი ამაღლდა.

ევროპის თასის ფინალურ ეტაპზე გასასვლელად 2 საკვალიფიკაციო ტურნირი გაიმართება - ანდორაში და საფრანგეთში. ჩვენ ანდორა გვაინტერესებს, სადაც თავი 12 ქვეყნის ნაკრებმა მოიყარა. ესენი არიან ესპანეთი, სლოვენია, საქართველო, პოლონეთი, ლატვია, ჩეხეთი, რუსეთი, გერმანია, ისრაელი, უკრაინა, ანდორა და ირლანდია.

12 გუნდი 4 ჯგუფშია გადანაწილებული. თითოეულში 3 ნაკრებია, რომელთაგან საქართველოს ყველაზე რთული მეტოქეები შეხვდა. საქართველოს ნაკრების მეტოქეები ესპანეთი და სლოვენია იქნებიან. თითოეული ჯგუფიდან 2 საუკეთესო გადის, ფინალურ ეტაპზე მოსახვედრად ისინი ბრძოლას მეოთხედფინალიდან გააგრძელებენ.

პლეი-ოფის პირველი წრის მომგები გუნდები ევროპის თასის საგზურს მოიპოვებენ, დამარცხებულებს კი საკვალიფიკაციო ტურნირში დარჩენილი 2 საგზურისთვის მოუწევთ ბრძოლა.

საქართველოს სახელს ანდორის საკვალიფიკაციო ეტაპზე შემდეგი მოთამაშეები იცავენ: ვახტანგ ქადარია (,,ქუთაისი’’), ირაკლი ჩლაიძე (,,კაკტუსი“), გივი ბაქრაძე (,,ოლიმპი’’) და ზუკა მაჩალაძე (,,დინამო’’). ოთხივე მათგანს 3X3 კალათბურთის გამოცდილება უმაგრებთ ზურგს და თუკი ანდორაში წარმატებას მიაღწევენ, 7-9 ივლისს ჰოლანდიის დედაქალაქ ამსტერდამში ევროთასის ფინალურ ეტაპზე მონაწილეობის უფლებას მოიპოვებენ.

0.125567