საქართველოს ეროვნული ნაკრების მეკარე ნუკრი რევიშვილმა თბილისის “დინამო” დატოვა. ამის შესახებ “დინამოს” ოფიციალური ვებგვერდი იტყობინება.
29 წლის ფეხბურთელი თბილისურ კლუბში ოქტომბერში ჩაირიცხა და “დინამოს” რიგებში 7 შეხვედრა ჩაატარა. მხარეებს შორის სამთვიანი კონტრაქტი იყო გაფორმებული.
რომელ კლუბში გააგრძელებს კარიერას რევიშვილი, ჯერჯერობით უცნობია. ეროვნული გუნდის კარის დარაჯს აქამდე, “დინამოს” გარდა, ქუთაისის “ტორპედოში”, ყაზანის “რუბინში”, მახაჩყალის “ანჟიში”, “კრასნოდარში”, გორის “დილაში”, “ვალეტაში”, “ტოსნოში” და “მორდოვიაში” უთამაშია.
რაც შეეხება “დინამოს”, რამდენიმე დღის წინ გავრცელებული ინფორმაციით, თბილისელები უკრაინელ მეკარეს სერგეი ლიტოვჩენკოს დაიმატებენ, რომელიც ბოლოს “ზუგდიდში” თამაშობდა. 29 წლის ლიტოვჩენო საქართველოში ჩამოსვლამდე ხარკოვის “არსენალში”, “ჰელიოსში”, “ვოლინში” და “ოლიმპიკში” გამოდიოდა. “დინამოში” მისი გადასვლის შესახებ ცნობა ჯერჯერობით ოფიციალურად არ დადასტურებულა.
