ბრაზილიის ნაკრების წევრი გაბრიელ ბარბოსა ამიერიდან მილანის „ინტერის“ ღირსებას დაიცავს. აღნიშნული ტრანსფერი რამდენიმე დღეა რაც გადაწყვეტილი გახლდათ, მაგრამ ოფიციალურად დღეს დადასტურდა - გაბიგოლმა (მისი მეტსახელია) „ნერაძურისთან“ 5-წლიანი კონტრაქტი გააფორმა, ხოლო იტალიურ გრანდს მისი ტრანსფერი 20 მილიონი ევრო დაუჯდა.

გაბრიელ ბარბოსა აქამდე „სანტოსში“ ირჯებოდა, რომლის რიგებშიც 20 წლის შემტევმა 153 შეხვედრაში 56 გოლის გატანა მოახერხა. ახალგაზრდა ფორვარდი ბრაზილიის ნაკრების წევრიცაა და ახლახან დასრულებულ რიოს ოლიმპიურ თამაშებზე ოქროს მედალიც მოიგო.