საქართველოს ფეხბურთის ფედერაციის საპრეზიდენტო არჩევნები, შესაძლოა, ხვალისთვის გადაიდოს. ფეხბურთის ფედერაციის გენერალური მდივნის მოვალეობის შემსრულებლის დიმიტრი ბოკერიას განცხადებით, დაპირისპირებულ მხარეებს შორის მოლაპარაკებები მიმდინარეობს, მათ შორის მედიატორის ფუნქციას უეფა-ს წარმომადგენლები, მათ შორის გრიგორი სურკისი ასრულებენ.

"ორივე მხარეს აქვს მოთხოვნები, ამ ეტაპზე არაფრის თქმა არ შემიძლია, ველოდებით, რომ ოდესმე გამოუშვებენ გეგა გობეჯიშვილს და ეს არის ერთ-ერთი მხარის მოთხოვნა", - განაცხადა ბოკერიამ.

ფეხბურთის ფედერაციის გენერალური სამდივნოს ხელმძღვანელ რევაზ შენგელიას განცხადებით, იმ შემთხვევაში თუ მოლაპარაკებები უშედეგოდ დასრულდა, ყრილობა ხვალისთვის გადაიდება.

"ყრილობის გადადების მიზეზი არის ქვორუმის არარსებობა, ახლა მიმდინარეობს მოლაპარაკება, თუ მოლაპარაკება უშედეგოდ დასრულდა, ამ შემთხვევაში ყრილობა ხვალისთვის გადაიდება, წესდების მიხედით, იმ შემთხვევაში თუ საარჩევნო ყრილობის გადადება მოხდება განმეორებითი ყრილობა 24 საათში უნდა გაიმართოს", - განაცხადა შენგელიამ.

სასტუმრო "ჰოლიდეი ინნ"-ში დღეს ფეხბურთის ფედერაციის პრეზიდენტის არჩევნები უნდა ჩატარდეს. ფეხბურთის ფედერაციის პრეზიდენტობისთვის სამი კანდიდატი იბრძვის: რევაზ არველაძე, ლევან კობიაშვილი და მამუკა კვარაცხელია. ფედერაციის პრეზიდენტი 4 წლის ვადით ირჩევა. აქამდე ეს თანამდებობა ზვიად სიჭინავას ეკავა, რომელიც ვადაზე ადრე, არჩევნებამე დაახლოებით ერთი თვით ადრე გადადგა. ამჟამად პრეზიდენტის მოვალეობას ვიცე პრეზიდენტი ალექსანდრე ჩივაძე ასრულებს.

www.interpressnews.ge