საქართველოს ფეხბურთის ფედერაციის საშეჯიბრო განყოფილების უფროსის დიმიტრი ბოკერიას განცხადებით, გურიის რეგიონული ფედერაციის დელეგატები ბოლო 4-5 წელია ისეთი სახის წერილით მოდიოდა სფფ-ში, როგორც ამ შემთხვევაში მოხდა.

როგორც ბოკერიამ საფეხბურთო დავების განმხილველი სპორტული ტრიბუნალის შემდეგ განაცხადა, სადაც გურიის რეგიონული ფედერაციის პრეზიდენტის მიერ დანიშნული დელეგატის კანონიერების საკითხი წყდებოდა, გურიის რეგიონული ფედერაციის გამგეობის სხდომა უფლებამოსილი არ ყოფილა, რომ დელეგატი დაენიშნა.

"ტრიბუნალის გადაწყვეტილებაზე ვიმსჯელებთ ფედერაციაში, თუ რატომ მიიღო ტრიბუნალმა ასეთი გადაწყვეტილება. ერთი რაზეც ვაპელირებდით, იყო ის, რომ გამგეობის სხდომა არ იყო უფლებამოსილი დელეგატი დაენიშნა. აღმასკომმა ამ კუთხით იმსჯელა და სწორი გადაწყვეტილება მიიღო. ვთვლით, რომ გურიის რეგიონალური ფეხბურთის ფედერაციის პრეზიდენტს კახა ებრალიძეს შეეძლო დაენიშნა დელეგატი. ბოლო 4-5 წლის განმავლობაში გურიიდან დელეგატები ზუსტად ასეთი სახის წერილით მოდიოდა ფედერაციაში და ახლა რატომ გახდა სადავო ვერ ვხვდები", - აღნიშნა ბოკერიამ.

შეგახსენებთ, საფეხბურთო დავების განმხილველმა სპორტულმა ტრიბუნალმა გურიის ფეხბურთის ფედერაციის გამგეობის წევრთა და სფფ-ს მოთხოვნები ნაწილობრივ დააკმაყოფილა და გოჩა ტყებუჩავას დელეგატობა გაუუქმა.

გადაწყვეტილების თანახმად, უარყოფილი იქნა მოთხოვნა ა(ა)იპ გურიის რეგიონალური ფეხბურთის ფედერაციის დელეგატად იური ჩხაიძის კანდიდატურის დამტკიცების შესახებ. ასევე გაუქმდა სფფ-ს აღმასკომის 2015 წლის 7 სექტემბრის გადაწყვეტილება იმ ნაწილში რომლის თანახმადაც გურიის რეგიონალური ფეხბურთის ფედერაციის დელეგატად დამტკიცდა გოჩა ტყებუჩავა.

pia.ge