სერბულ ზრენჯანინში დაწყებულ მსოფლიოს ჩემპიონატზე ჭაბუკ მოჭიდავეთა შორის, საქართველოს ბერძენ-რომაელთა ნაკრებმა ოქროს და ბრინჯაოს მედლები მოიპოვა. ტურნირის პირველ დღეს ჩემპიონი ზვიად პატარიძე (100 კგ.) გახდა, მე-3 ადგილი კი ლევან ქავჟარაძემ (58 კგ.) დაიკავა.

ევროპის წლევანდელი ჩემპიონატის ბრინჯაოს პრიზიორმა პატარიძემ “ოქროს გზაზე” ხუთ მეტოქეს აჯობა. ქართველმა ფალავანმა ყაზახი ახმეტკალიევი (3:1), ბულგარელი გენჩევი (6:0), აზერბაიჯანელი სიდიკოვი (8:0), რუსი დუბრონინი (5:3) და სერბი ჟივანოვიჩი (6:3) დაამარცხა.

რაც შეეხება ევროპირველობის ვიცე-ჩემპიონ ქავჟარაძეს, მან მეოთხედფინალამდე ყირგიზ ტალანბეკ ვულუს (7:0) და სომეხ მელიქიანს (7:2) აჯობა, შემდეგ კი მომავალ ჩემპიონ გერმანელ კინსინგერთან 0:8 წააგო. რეპეშაჟში ლევანმა უზბეკი რახმატოვი (10:0) და რუსი ვარდანიანი (7:0) იოლად დაჯაბნა.

გუშინვე საჭიდაო ხალიჩაზე დავით მარკოიძე (50 კგ.), გიორგი კურტანიძე (54 კგ.) და მინდია ბოლქვაძე (63 კგ.) გავიდნენ, თუმცა, წარმატებას ვერ მიაღწიეს.

21 აგვისტოს ბერძენ-რომაელები მედლებს დარჩენილ ხუთ წონით კატეგორიაში გათამაშდება და საქმეში ნუგზარ წურწუმიას (42 კგ.), თემურ შავაძეს (46 კგ.), ირაკლი თარხნიშვილს (69 კგ.), ნუკრი შავაძეს (76 კგ.) და გიგა ქოქოლაძეს (85 კგ.) ვხილავთ.