ზინედინ ზიდანი, ოფიციალური წარმომადგენლის რანგში დაესწრო უეფას ახალგაზრდული ლიგის მატჩს მადრიდის “რეალსა” და პსჟ-ს შორის. ჭაბუკმა რეალელებმა 1:0 გაიმარჯვეს და ნახევარფინალში გავიდნენ. მათ რიგებში ნახევარ საათს ითამაშა უმცროსმა ზიდანმა – ენცომ, რომელსაც ესპანეთში ენცო ფერნანდესად მოიხსენიებენ. “რეალმა” რიცხობრივ უმცირესობაში ჩაამთავრა მატჩი, მას შემდეგ, რაც 55-ე წუთზე უხეშობისთვის ჰექტორ მარტინესი გააძევეს.

ჭაბუკი ზიდანი 10-ნომრიანი მაისურით თამაშობს. ადრე ის “იუვენტუსის” სკოლაში ვარჯიშობდა, მაგრამ მამის სამეფო კლუბში გადაბარგების შემდეგ, “რეალში” გააგრძელა მეცადინეობა.

თებერვლის ბოლოს ის საფრანგეთის 19-წლამდელთა ნაკრებშიც მიიწვიეს, რამაც უფროსი ზიდანი ერთობ გაახარა. თუმცა, ენცოს თურმე საფრანგეთის გარდა, უფლება ჰქონია ესპანეთის, ანდა სულაც ალჟირის ნაკრები აირჩიოს, სადაც მას პაპა და ბებია ჰყავს.