სათაურში გამოტანილი ეს სიტყვები ცნობილ გერმანელ მწვრთნელ ოტო რეჰაგელს ეკუთვნის, ადრესატი კი ლევან კობიაშვილია. როგორც იცით, “მეფე ოტო” ლევანის მწვრთნელი გახლდათ ‘”ჰერტაში” და ზოგადადაც, რეჰაგელისგან ასეთი ქება ბევრს ნიშნავს - რეჰაგელისგანაა და არა ვინმე დამწყები სპეციალისტისგან.

Berliner Zeitung-ს “ჰერტას” ახლანდელი თავკაცის იოს ლუჰუკაის სიტყვებიც მოჰყავს:

“კობიმ კვლავ მოახდინა ჩემზე შთაბეჭდილება. მან მშვენივრად ითამაშა “ფრაიბურგთან” 3 დღის წინ გამართულ მატჩში (1:1). ის დიდი პროფესიონალია”.

როგორც იცით, კობიაშვილმა “ფრაიბურგთან” 70 წუთი ითამაშა და ეს მისი 337-ე მატჩი იყო ბუნდესლიგაში, თუმცა ამ სეზონში - პირველი. ის ბუნდესლიგას დაუბრუნდა იმ ქალაქის სტადიონზე, სადაც დაიწყო მისი გერმანული კარიერა და სადაც გულშემატკივართა ერთ-ერთი ფავორიტი ფეხბურთელი გახლდათ.

ლევანი ბოლო სეზონს ატარებს და როგორც ჩვენთან საუბარში თქვა, ზუსტად არ იცის, კონკრეტულად სად, მაგრამ ქართული ფეხბურთის სამსახურში ჩადგება.

“სანამ პენსიაზე გავალ, მანამდე ყველაფერს გავაკეთებ, რათა ბუნდესლიგაში კარგად ვითამაშო და ეს სეზონი დიდხანს დამამახსოვრდეს”.