რუსეთის პირველი დივიზიონის მე-16 ტურში სარანსკის “მორდოვიამ”, რომლის ღირსებასაც საქართველოს ეროვნული ნაკრების ცენტრალური მცველი აკაკი ხუბუტია იცავს, შინ ბელგოროდის “სალიუტს” 1:0 მოუგო. ხუბუტიამ შეუცვლელად ითამაშა, ხოლო მისი გუნდი გალიდერდა. სარანსკელებს 32 ქულა აქვთ და 19-გუნდიანი სატურნირო ცხრილის სათავეში არიან.

ნალჩიკის “სპარტაკმა” მოსკოვის “ტორპედო” მიიღო და უგოლო ფრეს გამორჩა. მასპინძელთაგან გუჯა რუხაია თამაშში 75-ე წუთზე ჩაერთო, ხოლო სირაძე – 82-ეზე. ნალჩიკელებმა თავი მხოლოდ 13 ქულას მოუყარეს და მე-17 პოზიციაზე არიან. 

ორენბურგის “გაზოვიკმა”, რომელშიც ზურაბ არზიანი გამოდის, საკუთარ მოედანზე “ნეფტეხიმიკს” ვერ მოუგო – 1:1.

ქართველი ფეხბურთელი განაცხადში არ იყო, რადგან დისკვალიფიცირებულია. მერაბ ურიდია “ნეფტეხიმიკის” თადარიგში იმყოფებოდა, მაგრამ თამაში არ მოუწია. “გაზოვიკს” 25 ქულა აქვს და მე-6 ადგილზეა.

იგივე ანგარიშით დასრულდა კალინინგრადში ადგილობრივი “ბალტიკასა” და  “სიბირის” დაპირისპირება. “ბალტიკაში” კვლავ არ უთამაშია გიორგი შელიას, რომელიც სკამზე “მყარად” ლატვიის ნაკრების მეკარემ ალექსანდრ კოლინკომ დასვა. “ბალტიკა” 19 ქულით მეთორმეტეა.