მსოფლიო რეიტინგის მე-12-ე ჩოგანი ხუან მონაკო ბარსელონაში, გრუნტის კორტებზე მიმდინარე პრესტიჟული საჩოგბურთო ტურნირის მესამე წრეში გავიდა. მან მეორე რაუნდში ძალზედ იოლად მოახერხა ახალგაზრდა ავსტრალიელი ბერნარდ ტომიჩის წინააღმდეგობის გადალახვა 6:0, 6:2.

მონაკომ მეტოქის ჩაწოდებაზე ხუთივე ბრეიკპოინტი გამოიყენა, საკუთარი მოწოდება კი არცერთხელ დაუთმია.  ხუანის ანგარიშზე ასევე გახლდათ 1 ეისი და 2 ორმაგი შეცდომა, ხოლო ბერნარდმა 2 ეისის წილ ამდენივე ორმაგი დაუშვა. ამ ჩოგბურთელთა ურთიერთდაპირისპირების პირველი მატჩი სულ რაღაც 48 წუთს გაგრძელდა.

ტურნირის მესამე წრეში მონაკო ფრანგ ჟერემი შარდის დაუპირისპირდება, რომელმაც თავისმხრივ ასპარეზობას იტალიელი პაულო ლორენცი გამოთიშა.