საქართველოს თავისუფალი სტილით მოჭიდავეთა ნაკრების უმსუბუქეს წევრს ვლადიმერ ხინჩეგაშვილს მსოფლიოს ჩემპიონის ტიტულს ერთადერთი გამარჯვება აშორებს. 57 კილოგრამ წონით კატეგორიაში მოჭიდავე ქართველმა ტაშკენტში მიმდინარე მსოფლიოს პირველობის ნახევარფინალში მონღოლი ბეხბაიარ ერდენებატი 6:3 დაამარცხა. გადამწყვეტ ორთაბრძოლაში კი ჩრდილოკორეელ კიონგ ლი იანგს დაუპირისპირდება.

ერდენებატის ძლევამდე ვლადიმერ ხინჩეგაშვილმა ძირითად ბადეში ჩილელი ანდრე რენატო ქუისპე (10:0), აზერბაიჯანელი ახმედმაბი გუეზატილოვი (8:2) და ბელარუსი ვლადისლაუ ანდრეიუ (4:0) ჩამოიშორა.

კიონგ ლი იანგმა კი ფინალის გზაზე სამხრეთკორეელ სუნგვონ კიმს (11:1), იაპონელ იუკი ტაკაჰაშისა (10:1) და ირანელ ჰასან საბზალი რაჰიმს (5:5) აჯობა.

დღესვე უზბეკურ ხალიჩაზე მედლები 70, 86 და 125 კილოგრამ წონით კატეგორიებშიც უნდა გათამაშდეს. საქართველოს სახელით ხალიჩაზე ალექსანდრე ჯაჭვაძე (70 კგ), დავით მარსაგიშვილი (86 კგ) და გიორგი საკანდელიძე (125 კგ) გავიდნენ, მაგრამ საპრიზო სამეულში შესვლის შანსი სამივემ დაკარგა. ჯაჭვაძე და საკანდელიძე პირველსავე შეხვედრაში დამარცხდნენ, მარსაგიშვილი კი მეოთხედფინალამდე მივიდა.

ფინალური ბლოკის შეხვედრები 18 საათიდან დაიწყება.