არნემის “ვიტესი” ევროტურნირებზე ვერ ითამაშებს. გუნდმა, რომელიც ერთხანს ჰოლანდიის  ჩემპიონატს ლიდერობდა, სეზონის ბოლო ნაწილი პირწმინდად ჩააგდო და ევროპის ლიგაზე გასასვლელ ნახევარფინალურ ფლეი-ოფშიც ორივე მატჩი წააგო “გრონინგენთან”. გასვლაზე 0:1-ის შემდეგ, “ვიტესი” შინ 1:4 დამარცხდა. გურამ კაშია სასტარტოში იყო და პირველი ტაიმის შემდეგ შეცვალეს, ხოლო ვაკო ყაზაიშვილმა მეორე ნახევარი სრულად ჩაატარა. 

ყაზანის “რუბინმა” გასვლაზე 4:0 აჯობა “კრილიას”. გამარჯვებულთა შორის, საბა კვირკველიამ შეუცვლელად ითამაშა. ქართველმა ყვითელი ბარათიც მიიღო. რაც შეეხება ალეკო ამისულაშვილს, ის სათადარიგო გახლდათ. “რუბინი” ცხრილის შუაში, მერვე ადგილზეა, ხოლო “კრილია” მე-14-ზე, ანუ ბოლოდან მესამეზე.

მატჩის შემდეგ, სამარელმა გულშემატკივრებმა თავის ფეხბურთელებს ობსტრუქცია მოუწყვეს. მათ ავტობუსში არ უშვებდნენ და ამდენი მარცხის გამო ახსნა-განმარტებას თხოვდნენ. 4 ფეხბურთელი მივიდა გულშემატკივრებთან და ისაუბრა – მათ შორის, ამისულაშვილიც გახლდათ. ბოლოს, ფანებმა აპლოდისმენტებით გააცილეს “კრილიას” მოთამაშეები.

ლატვიაში”სკონტომ” შინ 2:1 სძლია დაუგავპილსის “დაუგავას”. ამ მატჩში ოთხმა ქართველმა ითამაშა: მასპინძელთაგან ლაშა დვალმა და ირაკლი კლიმიაშვილმა, ხოლო სტუმართაგან გიორგი ხუმარაშვილმა და გიორგი ჩიხრაძემ. კლიმიაშვილი 83-ე წუთზე შეცვალეს. თამაზ პერტიას “სკონტო” მეორე ადგილზეა, “დაუგავა”- მეხუთეზე.

ლიდერმა “ვენტსპილსმა” შინ 1:0 სძლია “სპარტაკსს”. თორნიკე თარხნიშვილმა 90 წუთი ითამაშა. 9 მატჩი, 9 მოგება – ასეთია “ვენტსპილსის” შედეგიამ სეზონში. “იელგავამ” გასვლაზე 3:2 მოუგო ”დაუგავპილსს” და მეხუთეზეა: გამარჯვებულთა შორის ბოლო 35 წუთი ითამაშა გიორგი დიაკვნიშვილმა.