დღეს “უაით ჰართ ლეინზე” ლიგის თასის გათამაშებაში მაურისიო პოჩეტინოს “ტოტენჰემი” “ნოტინგემ ფორესტს” მიიღებს. ამ შეხვედრის წინ ერთ-ერთმა ინგლისურმა ვებგვერდმა საინტერესო სტატია გამოაქვეყნა, სადაც სტიუარტ პირსის გუნდიდან სამი ფეხბურთელია გამოყოფილი. სტატიის ავტორის ჯეკ ბერსფორდის აზრით, ეს ფეხბურთელები შეუქმნიან ყველაზე მეტ პრობლემას პრემიერლიგის წარმომადგენელს.                                       

მიქაელ მანსიენი

მანსიენი ლონდონის “ჩელსის” საფეხბურთო აკადემიის აღზრდილია. 2008-2009 წლების სეზონში “არისტოკრატთა” გუნდში საუკეთესო ახალგაზრდა მოთამაშედ დასახელდა. 2008 წელს ფაბიო კაპელომ გერმანიასთან ამხანაგური თამაშის წინ ეროვნულ ნაკრებში გამოიძახა თუმცა იტალიელმა მიქაელი მოედანზე არ შეუშვა.

თამაშობდა ქპრ-სა და “ვულვზში”, ხოლო“ნოტინგემში” გასული ზაფხულის სატრანსფერო ფანჯრის დროს “ჰამბურგიდან” გადავიდა. გერმანულ კლუბში სამი სეზონი გაატარა, თუმცა ტრავმის გამო მხოლოდ 55 მატჩში მიიღო მონაწილეობა.

26 წლის მცველს უთამაშია ინგლისის 16, 17, 18, 19 და 21-წლამდელთა ნაკრებებში.                

ჰენრი ლანსბერი

ჰენრი ლანსბერი ლონდონის “არსენალის” საფეხბურთო სკოლაში თამაშობდა, 2007 წელს არსენ ვენგერმა ძირითად გუნდში დააწინაურა, თუმცა ჰენრიმ მხოლოდ 8 თამაშში მიიღო მონაწილეობა და ერთი გოლის გატანა მოახერხა. ლიგის თასზე ჯეკ უილშირის პასით “ტოტენჰემს” გაუტანა. ამ დროს უილშირი 18 წლის იყო, ხოლო ლანსბერი 19 წლის.

2012 წელს სპორტული ინტერნეტგვერდები მოიცვა ლანსბერის მიერ გატანილმა საოცარმა გოლმა. ახალგაზრდული ნაკრების მაისურით ბელგიის ნაკრებს მარცხენა ფრთიდან მარჯვენა ფეხით ბურთი ლამაზად მოუჭრა.

23 წლის ნახევარმცველი თამაშობდა ინგლისის 16, 17, 19 და 21 წლამდელთა ნაკრებებში.                

ბრიტ ასომბალონგა

ასომბალონგამ გასული სეზონი ინგლისის პირველ დივიზიონში გაატარა. “პიტერბროს” მაისურით 43 თამაშში 23 გოლი გაიტანა და “ნოტინგემელთა” ყურადღება მიიქცია.

21 წლის თავდამსხმელში “ნოტინგემმა” 5 მილიონი ფუნტი სტერლინგი გადაიხადა და კლუბის რეკორდიც დაამხო. ინგლისურმა კლუბმა 1997 წელს პიერ ვან ჰოიდონკის ტრანსფერისთვის 4,5 მილიონი ფუნტი გაიღო, რაც ასომბალონგას სატრანსფერო თანხას ჩამოუვარდება.

ასომბალონგამ მიმდინარე სეზონში დიეგო კოშტას მსგავსი შედეგი აჩვენა. კოშტას ანგარიშზე 7 გოლია, ხოლო “ნოტინგემის” ფორვარდმა 8 გოლი გაიტანა.

დიმა შარიქაძე