ვიქტორ სანიკიძის “მონტეპასკის” მორიგ სასწაულამდე ცოტა დააკლდა. შეგახსენებთ, რომ “ჩიმბერიო ვარეზესთან” ნახევარფინალური სერიის მე-4 მატჩში სიენელებმა 17-ქულიანი სხვაობა “დაქაჩეს” და 78:77 იმარჯვეს, დღეს კი სტუმრად გამართულ შეხვედრაში უკვე 15-ქულიანი ჩამორჩენა აღმოფხვრეს და მხოლოდ დრამატულ ბოლო წამებზე წააგეს – 67:71.

სასიხარულოა, რომ საქართველოს ნაკრების ფორვარდი მოედანზე ერთ-ერთი საუკეთესო იყო. უკვე მერამდენედ ხდება – როდესაც “მონტეპასკის” მთავარი მწვრთნელი ლუკა ბანკი “ვიკას” საკმარისი სათამაშო დროს აძლევს, მისგან დიდ ხეირს ნახულობს, თუმცა, სანიკიძემ იმას ვერაფრით მიაღწია, რომ სასტარტო ხუთეულის წევრად იქცეს.

ამჯერადაც, ვიქტორი სათადარიგო გახლდათ, თამაშში ესტონელი კრისტიან კანგურის (აქვე ვთქვათ, რომ მან 17 წუთში ქულა ვერ გააკეთა) ნაცვლად ჩართვის შემდეგ კი, შეუდარებელი გახლდათ. ქართველმა კალათბურთელმა ორმაგი დუბლი შეასრულა, მისი მოედანზე ყოფნის პერიოდში კი სიენელებმა მეტოქეზე 18 ქულით მეტი ჩააგდეს, რაც სტუმართათვის საუკეთესო მაჩვენებელი იყო.

22 წუთში ”ვიკას” მონაგარი 10 ქულა, 11 მოხსნა (3 მეტოქის ფარზე) და 3 ჩაჭრა გახლდათ. სანიკიძემ 3-ვე ორქულიანი, 2-დან 1 სამქულიანი და 3-დან 1 საჯარიმო ჩააგდო, ბურთი 3-ჯერ დაკარგა, 3 პერსონალური ფოლი მიიღო და მის წინააღმდეგაც ამდენჯერვე დაჯარიმდნენ.

შედეგად, ქართველი ფორვარდის სარგებლიანობის კოეფიციენტმა 18 შეადგინა, რითაც იგი მხოლოდ სიენელთა გამოკვეთილ ლიდერ ბობი ბრაუნს (27) ჩამორჩა. ამერიკელმა კალათბურთელმა 32 წუთში 25 ქულა მიითვალა და ამასთან, ვარეზელები მის წინააღმდეგ ერთბაშად 10-ჯერ დაჯარიმდნენ.

ამ წარუმატებლობის შემდეგ, იტალიის ჩემპიონატის ნახევარფინალურ სერიაში “მონტეპასკის” მინიმალური უპირატესობაღა (3:2) გააჩნია, თუმცა კი, მოედნის უპირატესობას ფლობს. თუკი მომდევნო მატჩში, რომელიც 5 ივნისს სიენაში შედგება, მასპინძლები იმარჯვებენ, ფინალის საგზური სანიკიძეს და მის თანაგუნდელებს დარჩებათ, თუ არადა, სერიის გადამწყვეტ მე-7 შეხვედრას, 7 ივნისს, “ჩიმბერიო” მიიღებს.

აქვე ვთქვათ, რომ შესაძლოა დღესვე გაირკვეს მე-2 ფინალისტის ვინაობა. “ლენოვო კანტუ” “ასეა რომას” სერიას 3:2-ს უგებს და საშინაო შეხვედრაში გამარჯვების შემთხვევაში, მიზანსაც მიაღწევს, არადა კანტუელები დაპირისპირების დასაწყისში მეტოქეს 0:2 ჩამორჩებოდნენ.

http://www.legabaskettv.it/video/5678/g5__cimberio_varese-montepaschi_siena