მსოფლიო რეიტინგის მე-15 ჩოგანი შვეიცარიელი სტანისლას ვავრინკა განაგრძობს წარმატებულ სვლას ესპანეთის დედაქალაქ მადრიდში მიმდინარე საჩოგბურთო მასტერსზე. ნახევარფინალურ ეტაპზე მან მძიმე ბრძოლაში 6:3, 4:6, 6:4 დაამარცხა ჩეხი ტომაშ ბერდიხი და ფინალში გააღწია, სადაც ესპანელ რაფაელ ნადალთან მოუწევს დაპირისპირება.

მატჩი 1 საათსა და 55 წუთს გაგრძელდა და ამ დროის განმავლობაში შვეიცარიელმა ოთხჯერ შეძლო მეტოქის ჩაწოდების აღება, საკუთარი კი ორჯერ დათმო. ლოზანაში დაბადებულმა ჩოგბურთელმა 5 ეისი ჩააწოდა და 4 ორმაგი შეცდომა დაუშვა, ხოლო ბერდიხმა 8 ეისით და 1 ორმაგით გამოიჩინა თავი.

ამ ჩოგბურთელთა ურთიერთდაპირისპირებათა ისტორიაში ანგარიში 6:5 გახდა, სტანისლასის სასარგებლოდ.

მატჩისშემდგომ პრესკონფერენციაზე ტომაშმა მეტოქეს მიულოცა გამარჯვება და აღნიშნა: "მესამე სეტის ბოლო 4 გეიმი საზიზღრად ჩავატარე, ასე თამაში ნამდვილად არ შემფერის და ამიტომაც დავისაჯე."