ვიგოს “სელტასთან” მატჩში (3:0) მიღებული მძიმე ტრავმის გამო, კატალონიის “ბარსელონას” მეკარე ვიქტორ ვალდესი ლაზარეთში 7 თვეს გაატარებს. კატალონიელთა ოფიციალური საიტის ცნობით, ესპანელს მუხლზე ოპერაცია გერმანიაში წარმატებით ჩაუტარდა.

მოგეხსენებათ, “ბლაუგრანას” კარის დარაჯს მუხლქვეშა მყესები გაუწყდა, ამგვარი ტრავმის მოშუშებას კი, 6-7 თვე სჭირდება. არაა გამორიცხული, “ბარსელონამ” ვალდესს კონტრაქტის გახანგრძლივება შესთავაზოს და სხვა კლუბში გამოჯანმრთელების შემდეგ გაუშვას.

ვალდესს კატალონიელებთან მოქმედი კონტრაქტი ზაფხულში ეწურება. ესპანელს “კამპ ნოუდან” აბარგება გადაწყვეტილი ჰქონდა. რამდენადაც ცნობილია, “მონაკო” ვალდესის ტრავმას არ უშინდება და მზადაა, მეკარეს კონტრაქტი ახლავე შესთავაზოს.