მაშ ასე, უიმბლდონის ქალთა ერთეულთა შეჯიბრების ფინალში ჩემპიონობისთვის ფრანგი მარიონ ბარტოლი და გერმანელი საბინ ლისიცკი იბრძოლებენ. ამ უკანასკნელმა მსოფლიო რეიტინგსიის პოლონელი მეოთხე ნომერი აგნეშკა რადვანსკა 6:4, 2:6, 9:7 დაამარცხა და პირველად გავიდა სადიდსლემო ტურნირის ფინალში.

პირველი სეტი 23 წლის ლისიცკიმ მოიგო, მეორეში 24 წლის რადვანსკამ იმარჯვა. მეტად საინტერესოდ წარიმართა გადამწყვეტი მესამე სეტი. თავდაპირველად რადვანსკა 3:0 დაწინაურდა, მაგრამ ლისიცკიმ ასევე მიჯრით 3 გეიმის მოგება მოახერხა. გერმანელმა მეცხრე გეიმი პოლონელი მოწოდებაზე მოიგო და 5:4 დაწინაურდა, თუმცა, შემდეგ საკუთარი მოწოდება დაუთმო მეტოქეს და მატჩის მოგების რეალური შანსი გაუშვა ხელიდან. გადამწყვეტი 15-ე გეიმი გამოდგა, რომელიც ლისიცკიმ რადვანსკას მოწოდებაზე მოიგო, შემდეგ თავისივე მოწოდებაც აიღო და ფინალში გავიდა. მეტოქეებმა კორტზე 2 საათი და 18 წუთი გაატარეს, ორივემ 6 ბრეიკი შეასრულა, ეისებით კი ლისიცკიმ რადვანსკას აშკარად აჯობა – 9 ერთის წინააღმდეგ.

საბინ ლისიცკისა და აგნესკა რადვანსკას პირადი შეხვედრების ანგარიში 2:1 გახდა გერმანელის სასარგებლოდ.

აქვე მოგახსენებთ, რომ ქალთა ერთეულთა თანრიგში უიმბლდონის ფინალში გერმანიის ბოლო წარმომადგენელი ლეგენდარული შტეფი გრაფი გახლდათ, რომელმაც ბოლოჯერ გადამწყვეტ მატჩში 1999 წელს ითამაშა და ამერიკელ ლინდსი დევენპორტთან წააგო.