“რამდენიმე ჩინებული ფეხბურთელი დავიმატეთ და ახლა შარშანდელზე ძლიერი გუნდი გვყავს, ამიტომ ყველა ტურნირის მოგებას შევეცდებით, მათ შორის ჩემპიონთა ლიგისას. მოგეხსებნებათ, ლიგა ორჯერ ზედიზედ არავის მოუგია და ჩვენ ისტორიის შეცვლას ვეცდებით, - თქვა “რეალის” დამრიგებელმა კარლო ანჩელოტიმ, - “სევილიას” კარგი სეზონი ჰქონდა და ევროპის ლიგა შემთხვევით არ მოუგია. ამ გუნდის ფეხბურთელებმა თავი ჩინებულად წარმოაჩინეს და ტიტულიც დაიმსახურეს. ახლა, “სევილია” შეიცვალა და გარკვეულწილად, გუნდი-გამოცანაა – ახალი მოთამაშეებს რა შეუძლიათ, ჯერჯერობით, უცნობია. ვნახოთ, სუპერთასზე როგორ გაირჯებიან.”

მადრიდელები სუპერთასისთვის კარგად მოემზადნენ, ერთი ეგ არის, ბოლომდე გარკვეული არ არის ითამაშებს თუ არა მუხლმტკივანი კრიშტიანუ რონალდუ. სამაგიეროდ მინდორზე იქნებიან ხამეს როდრიგესი და ტონი კროოსი. კოსტარიკელი მეკარე კეილორ ნავასი კი მატჩს სათადარიგოთა სკამზე შეხვდება.

ახლა კარდიფში ყველაზე პოპულარული კაცი გარეთ ბეილია. მოგეხსენებათ, ის კარდიფშია დაბადებული, თუმცა უელსურ კლუბებში არასოდეს უთამაშია.

უეფას სუპერთასი

12 აგვისტო. კარდიფი. "მილენიუმი". 22:45

რეალი - სევილია

სავარაუდო შემადგენლობები

რეალი: კასილიასი - კარვახალი, პეპე, რამოსი, კოენტრაო - მოდრიჩი, კროოსი - ბეილი, ხამეს როდრიგესი, რონალდუ - ბენზემა

მწვრთნელი: კარლო ანჩელოტი

სევილია: ბეტუ - ნავარო, ფაციო, კოკე, მორენო - ვიტოლო, ტროხოვსკი, იბორა, რეიესი - გამეირო, ბაკა

მწვრთნელი: უნაი ემერი

მსაჯი: მარკ კლატენბურგი (ინგლისი)