“იბერია სტარის” დირექტორმა გიორგი დარჯანიამ ოთხშაბათს, მიხეილ მესხის სახელობოს სტადიონის საპრესკონფერენციო დარბაზში ჟურნალისტებთან შეხვედრისას განაცხადა, რომ უეფამ თბილისურ კლუბს უეფას ფუტსალის თასის ძირითადი ეტაპის ჯგუფური ტურნირის მასპინძლობაზე უარი უთხრა.

დარჯანიას თქმით, ეს უპრეცედენტო შემთხვევაა, რადგან აქამდე ქართველ ფუტსალისტებს, საკლუბო თუ სანაკრებო დონეზე, ჯგუფური ტურნირის თბილისში ჩატარებაზე პრობლემა არასოდეს შექმნიათ.

 “იბერიას სტარის” ირგვლივ შექმნილ ვითარებასთან დაკავშირებით, დარჯანიამ ჟურნალისტებს კლუბის ოფიციალური განცხადებაც გააცნო:

“გუშინ საქართველომ უეფას ჩემპიონთა ლიგის ფინალს უმასპინძლა. დღეს კი, უეფამ საქართველოს ჯგუფური ეტაპის მასპინძლობაზე უარი უთხრა.

უარის მიზეზი ის ფაქტი გახდა, რომ საქართველომ უეფას ჩაუგდო პროექტი, რომელიც ჩვენს ქვეყანაში ფუტსალის შემდგომ განვითარებასა და პოპულარიზაციას ითვალისწინებდა. ამ პროექტის ფარგლებში, უეფა საქართველოს წლების მანძილზე უკმაყოფილებდა აბსოლუტურად ყველა მოთხოვნას საკლუბო თუ სანაკრებო ტურნირების მასპინძლობის თაობაზე. ამ პროექტის ბოლო ეტაპი იყო თბილისში ჩემპიონთა ლიგის ფინალის ჩატარება და უეფას პრეზიდენტის ვიზიტი.

იმ ფაქტმა, რომ ლიგის ფინალიდან ორ კვირაში, ფინალის მასპინძელი კლუბი აღმოჩნდა უმძიმეს ფინანსურ კრიზისში და რაც ბევრად მნიშვნელოვანია – საქართველოში არ აღმოჩნდა არც ერთი კომპანია თუ სახელმწიფო ორგანიზაცია, რომელიც პრობლემით დაინტერესდებოდა და კლუბს გადარჩენაში დაეხმარებოდა, უეფას ნათლად დაანახა, რომ საქართველოში ფუტსალის პოპულარიზაციის და მასობრიობის გეგმა ჩავარდა. შედეგად, უეფამ ადეკვატური გადაწყვეტილება მიიღო და საქართველოს ჩემპიონთა ლიგის ჯგუფური ეტაპის მასპინძლობაზე უარი უთხრა.

ერთდერთი ორგანიზაცია, რომელმაც მსგავსი საკითხებისადმი უეფას დამოკიდებულება იცის, საქართველოს ფეხბურთის ფედერაციაა. ამასთანავე, ფედერაცია ერთადერთი ორგანიზაცია აღმოჩნდა, რომელმაც “იბერია სტარს” თანადგომა ოფიციალურად გამოუცხადა და თბილისის მერიას შუამდგომლობით მიმართა. თუმცა, მერისს შესაბამისი სტრუქტურების ხანგრძლივი ფიქრისა და გაჭიანურებული პსუხის გამო, უეფაში საქართველოს იმიჯი შეირყა.

დღეს, ერთადერთი ადამიანი, ვინც განსაკუთრებით გაიგებდა შექმნილ სიტუაციას, ვინც ჩემპიონთა ლიგის მოგებისა და წაგების გემო იცის, კახა კალაძეა.

დღემდე, კახა კალაძე არ შეგვიწუხებია, მაგრამ ვიტოვებთ ბოლო იმედს, რომ საქართველოს ვიცეპრემიერს 3 ივლისამდე შევხდებით. ამ დღეს, უეფა ნიონში ჩემპიონთა ლიგის წილისყრას ატარებს და ოფიციალურად გამოცხადდება, “იბერია სტარი” რომელ დღეს, რომელ ქალაქში და რომელ საათზე, რომელ მეტოქეს დაუპირისპირდება.

ძირითადი დრო დასრულებულია, 3 ივლისს, თბილისის დროით 16 საათზე კი, დამატებითი დროც ამოიწურება”.

დარჯანიას თქმით, “იბერია სტარს” თვითლიკვიდაცია არ გამოუცხადებია. მისი განცხადებით, კლუბის დამფუძნებელი ვახტანგ წერეთელი, რომელიც ქვეყნის მრავალგზის ჩემპიონს აქამდე აფინანსებდა, არსად წასულა და მზადაა, “იბერია სტარს” კვლავ დაეხმაროს. თუმცა, იმის ფინანსები აღარ აქვს, რათა ამ საქმეს თავი მარტომ გაართვას და მხარში ვინმე უნდა ამოუდგეს.

თუ “იბერია სტარი” შემოდგომაზე უეფას ფუტსალის თასის ძირითად ჯგუფურ ეტაპზე ვერ ითამაშებს, ამას უეფას მხრიდან სანქციები მოჰყვება, რაც დარჯანიას აზრით, ქვეყნის იმიჯს დაარტყამს.