კორეული ქაოტური რბოლის შემდეგ, ჩემპიონობისთვის მებრძოლ ოთხ პილოტს (სულ ხუთნი არიან) ერთმანეთს მაქსიმუმ 25 ქულა აშორებს. ზუსტად ამდენი ეწერება გამარჯვებულს და აქედან გამომდინარე, ლიდერის ერთი ფეხის დაცდენაც საკმარისია იმისათვის, რომ მას რამდენიმე პილოტმა გაუსწროს. არადა, სეზონის დასრულებამდე ორი რბოლაღა რჩება.
კორეაში ყველაზე მეტად მაინც ”რედ ბულის” ავსტრალიელმა პილოტმა მარკ უებერმა იზარალა, ვინც მანამდე ”ფერარის” ესპანელ ფერნანდო ალონსოს 14 ქულას უგებდა, ახლა კი მასვე 11 ქულით ჩამორჩება. მაგრამ ოზი პილოტი იმედოვნებს, რომ ტიტულისთვის ბრძოლა ჯერ კიდევ წინაა და დაკარგულის ანაზღაურებას შესძლებს.
კორეულ რბოლაში, მას შემდეგ, რაც ტრასა პეისქარმა დატოვა, უებერმა თავის ”რედ ბულზე” კონტროლი დაკარგა და კედელს დაეჯახა. შემდეგ, დამტვრეული მანქანა ტრასას უკუსვლით დაუბრუნდა და გერმანელი ნიკო როსბერგის ”მერსედესიც” თან გაიყოლა. უებერმა აღიარა, რომ მომხდარი მისი შეცდომის ბრალია.
”მომხდარი მთლიანად ჩემი ბრალია. მე-12 მოსახვევიდან გამოსვლისას, ერთი ბორბლით კერბზე გავიარე და ამან შეცდომა დამაშვებინა. დღეს არ გამიმართლა. რომ მოვცურდი, მანქანის გასწორება ვცადე. მეგონა, გამომივიდა, მაგრამ პირიქით მოხდა. კედელი ახლოს იყო და მასთან შეჯახებამ მანქანა დააზიანა. მერე კი ნიკოსაც დავეჯახე. მოკლედ, ყველაფერი ბოლო ორ რბოლაში გადაწყდება”, - განაცხადა უებერმა.
დარჩენილ ორ რბოლაში, მაქსიმუმ 50 ქულის აღებაა შესაძლებელი და ავსტრალიელი პილოტი დარწმუნებულია, რომ ამ ეტაპზე, ადგილებს დიდი მნიშვნელობა არ აქვს და რომ ჩემპიონობისთვის ბრძოლა ჯერ არ დასრულებულა:
”ამ მომენტში, პოზიციებს დიდი მნიშვნელობა არ აქვს. ისინი შეიძლება ძალიან სწრაფად შეიცვალოს, როგორც ეს დღეს მოხდა. ამ სეზონში მეორე რბოლა ვერ დავასრულე. წინ კიდევ ორი რბოლა გვაქვს და ყველაფერს გავაკეთებ, რომ სასურველ მიზანს მივაღწიო”.

 

მოამზადა მერაბ ლორთქიფანიძემ
http://formula1ge.blogspot.com/