უცნაური თამაში იყო: ცხინვალის “სპარტაკს” 92 წუთის განმავლობაში ერთხელაც არ შეუწუხებია როინ კვასხვაძე, მაგრამ მსაჯის მიერ დამატებულ ბოლო წამებზე კახა კაკაშვილმა დაახლოებით 25 მეტრიდან დაარტყა, ბურთი მინდორზე მეკარის წინ დაეცა და კვასხვაძემ ვერ მოიგერია - 1:0.
“სპარტაკს” ამ ტურამდე ქულაც არ ჰქონდა, ახლა კი ერთბაშად 3 აიღო და თანაც იმ დროს, როცა ერთ ქულაზეც ყაბულს იქნებოდა. “ზესტაფონი” კი... გორის “დილასთან” მშვენიერი თამაშისა და მოგების შემდეგ, ბევრი იფიქრებდა, იმერლები წარმატებულ სერიას გაჰყვებიანო, მაგრამ ეს “ზესტაფონი” იმდენად განსხვავდება გია გეგუჩაძისა და გია ჭიაბრიშვილის დროინდელი გუნდისგან, როგორც რატკო დოსტანიჩისა და მისი თანამემამულე რადომირ ანტიჩისა თუ ვუაიდინ ბოშკოვის სამწვრთნელო კარიერა.
სიცხე იყო და ტემპიც ისეთი დუნე ვიხილეთ, მეტი არ შეიძლებოდა. განსაკუთრებით ეს ეხება პირველ ტაიმს, როცა ფეხბურთელები მოედანზე დადიოდნენ (სრული ამ სიტყვის მნიშვნელობით). მხოლოდ ერთხელ, ტაიმის ბოლო წუთზე შეიქმნა ხიფათი, როცა ირაკლი ქობალიას აუღო გიორგი ნადირაძემ.
მეორე ნახევარში სტუმრებს გაცილებით მეტი შანსი ჰქონდათ და ხან არაზუსტად ურტყამდნენ, ხან მეკარე ნადირაძე თამაშობდა მშვენივრად. ილია კანდელაკის შეტევაში ჩართვის შემდეგ, გურამ სამუშიამ ახლოდან ოდნავ გადააცილა
მეორე ტაიმის შუაწელს ნადირაძემ ლევან შარიქაძის დარტყმული ბურთი სასწაულებრივად მოიგერია, ხოლო ყველაზე რთული მაინც ავთო ენდელაძის დარტყმულის კუთხურზე უკუგდება იყო - საქართველოს 21-წლამდელთა ნაკრების მეკარე საუკეთესო იყო მატჩში.
კიდევ იყო მომენტები, რომელიც უფრო სპარტაკელთა არცთუ მწყობრი დაცვის დამსახურებაა, ვიდრე სტუმართა გააზრებული შეტევებისა: თედო გრიგალაშვილს თავური აუცდა, ხოლო 82-ე წუთზე სანდრო გურულის პასის შემდეგ, გიორგი ადამია ურტყამდა და მცველმა ლევან ქურდაძემ გადაარჩინა გუნდი.
ბოლო 10-15 წუთში ბევრჯერ გადარჩა “სპარტაკი”. შეცვლაზე შესული გურული ჩაერთო კარგად და მან ცოტა ენერგია შემატა შეტევებს, თორემ მანამდე “ზესტაფონის” შეტევები დუნე და ერთფეროვანი იყო. გუნდში ვერ აღმოჩნდა ისეთი შემტევი, რომელიც თავის თავზე აიღებდა ინდივიდუალურად თამაშს და რაიმე ორიგინალურის შექმნას.
ბოლოს კი, “სპარტაკის” კონტრშეტევამ მოიტანა გოლი და სადებიუტო გამარჯვება.
მატჩის შემდეგ:
რატკო დოსტანიჩი: “მეტოქეს გამარჯვებას ვულოცავ. როცა ამდენი საგოლე შანსიდან ერთსაც ვერ იყენებ, რთულია რამის თქმა. “დილასთან” კარგი თამაში ვაჩვენეთ, მაგრამ ბიჭებს ვეუბნებოდი, რომ “სპარტაკი” იოლად არაფერს დაგვითმობდა და ბრძოლა იქნებოდა საჭირო.
...ჩვენი მთავარი მინუსი ისაა, რომ მხოლოდ 4 კვირა გვქონდა ჩემპიონატისთვის მოსამზადებლად. შემადგენლობა თანდათან იკრიბებოდა: აჯურუ და გურული გვიან შემოგვიერთდნენ, ენდელაძესა და სამუშიას ასაკობრივ ნაკრებებში ჰქონდათ თამაშები. ეს ყველაფერი მოქმედებს”.
ვლადიმერ ხაჩიძე: “სიმართლე გითხრათ, ძალიან უკმაყოფილო ვარ ჩემი გუნდის თამაშის ხარისხით, მაგრამ ეს ის შემთხვევაა, როცა გაგვიმართლა. წინა მატჩებში კი რამდენჯერმე იღბალმა გვაქცია ზურგი: “ტორპედოსთან” 4-5 მომენტიდან ერთიც ვერ გამოვიყენეთ, “მეტალურგთან” გოლი არ ჩაგვითვალეს... დღეს პირიქით, მეტოქეს არ გაუმართლა.
...წამყვანი ფეხბურთელები გვაკლდა. მგელაძესა და მეგრელიშვილს ტრავმა აქვთ. შონიას ერთი კვირაა არ უვარჯიშია და დღესაც არ გავიყვანდი მოედანზე, მაგრამ შევატყვე, რომ ნახევარდაცვაში ძალიან არეულად გვქონდა საქმე.
...გვაქვს რგოლებში საკადრო პრობლემა. ერთადერთი, მეკარის პოზიციაა, რომელიც არ მაფიქრებს. ველოდებით ვახტანგ ფანცხავას ათამაშებას. ის თუ სათანადო კონდიციებში შევა, დიდად დაგვეხმარება და ბევრ გუნდს გავუწევთ კონკურენციას. სხვაგვარად გაგვიჭირდება: დღეს, ფაქტობრივად, პირველი გოლი გავიტანეთ სეზონში. სულ მეორეა, მაგრამ ის ერთი საკუთარ კარში შეაგდო მეტოქის მცველმა”.
“სპარტაკი” (ცხინვალი) - “ზესტაფონი” 1:0 (0:0)
21.09. 16:00.
სპარტაკი: ნადირაძე, ჭაფოძე, ქურდაძე, კონსტანტინე ხიზანეიშვილი, ბურძენაძე (შონია 52), კილასონია, კვეკვესკირი, ჩაფიძე, თუხარელი (თექთურმანიძე 76), მეტრეველი, ფანცხავა (კაკაშვილი 66).
მწვრთნელი: ვლადიმერ ხაჩიძე.
ზესტაფონი: კვასხვაძე, თორნიკე გრიგალაშვილი, რენე ფერეირა, თედო გრიგალაშვილი, კანდელაკი, აჯურუ, შარიქაძე (ჭანტურიშვილი 69), კუტალია (სანდრო გურული 69), სამუშია (ენდელაძე 80), ადამია, ქობალია.
მწვრთნელი: რატკო დოსტანიჩი.
გოლი: 1:0 კაკაშვილი (90+3).
გაფრთხილება: თედო გრიგალაშვილი (34), კუტალია (43), კვეკვესკირი (54), მეტრეველი (70), ჩაფიძე (88).
მსაჯი: ლაშა სილაგავა.
“ჩიხურა” (საჩხერე) – “დილა” (გორი) 3:1 (1:0)
გოლები: 1:0 ჯიღაური (20), 1:1 მოდებაძე (46), 2:1 ტატანაშვილი (54), 3:1 გაბედავა (90)
გურია (ლანჩხუთი) - მეტალურგი (რუსთავი) 3:1 (0:0)
გოლები: 0:1 კორღალიძე, 1:1 შენგელია (63) , 2:1 შალამბერიძე (83), 3:1 ჩიკვილაძე (90)
“ზუგდიდი” – “ტორპედო” (ქუთაისი) 0:0
“მერანი” (მარტვილი) – “სიონი” (ბოლნისი) 2:0 (2:0)
გოლები: 1:0 კუჭუხიძე (12), 2:0 ფარულავა (34)
ვიტ ჯორჯია (თბილისი) - დინამო (თბილისი) 0:2 (0:0)
გოლები: 0:1 გოგა (73), 0:2 გრიგალაშვილი (90)
სატურნირო მდგომარეობა
| 1. | დინამო | 6 | 4 | 1 | 1 | 11:4 | 13 | |
| 2. | ჩიხურა | 6 | 4 | 0 | 2 | 13:8 | 12 | |
| 3. | მერანი | 6 | 4 | 0 | 2 | 9:7 | 12 | |
| 4. | ტორპედო | 6 | 3 | 3 | 0 | 6:3 | 12 | |
| 5. | გურია | 6 | 3 | 0 | 3 | 6:8 | 9 | |
| 6. | ვიტ ჯორჯია | 6 | 2 | 2 | 2 | 7:5 | 8 | |
| 7. | დილა | 6 | 2 | 2 | 2 | 7:7 | 8 | |
| 8. | მეტალურგი | 6 | 2 | 2 | 2 | 6:9 | 8 | |
| 9. | სიონი | 6 | 2 | 1 | 3 | 7:7 | 7 | |
| 10. | ზუგდიდი | 6 | 1 | 2 | 3 | 3:9 | 5 | |
| 11. | ზესტაფონი | 6 | 1 | 1 | 4 | 5:7 | 4 | |
| 12. | სპარტაკი | 6 | 1 | 0 | 5 | 2:8 | 3 |
შენიშვნა: საქართველოს ფეხბურთის ფედერაციის დებულების თანახმად, უმაღლეს, პირველ და დუბლების ჩემპიონატებში თანაბარი ქულების დაგროვების შემთხვევაში, ადგილები შემდეგი პრიორიტეტული პრინციპით გაირკვევა:
- ჩემპიონატში უშუალოდ ურთიერთშეხვედრების შედეგები (ქულათა რაოდენობა და შემდეგ ბურთების უკეთესი სხვაობა. ბურთების ერთნაირი სხვაობის შემთხვევაში, უპირატესობა მიენიჭება გუნდს, რომელსაც ერთმანეთთან შეხვედრებში სტუმრად მეტი გოლი აქვს გატანილი);
-ჩემპიონატში მოგებათა მეტი რაოდენობა;
-ჩემპიონატში გატანილი და მიღებული ბურთების უკეთესი სხვაობა;
-ჩემპიონატში გატანილი გოლების მეტი რაოდენობა;
-ჩემპიონატის განმავლობაში, გუნდის მიერ მიღებული წითელ-ყვითელი ბარათების რაოდენობა (წითელი 3 ქულა, ყვითელი – 1 ქულა. თანაბარი ქულების დაგროვების შემთხვევაში, უპირატესობა მიენიჭება ნაკლებ წითელ ბარათს);
-თუ გუნდებს ეს მაჩვენებელიც თანაბარი აღმოაჩნდებათ, ადგილების გამოსავლენად მოეწყობა კენჭისყრა.
