საქართველოს ეროვნული საფეხბურთო ნაკრების ნახევარმცველი თორნიკე ოქრიაშვილი მომავალ სეზონსაც მარიუპოლის “ილიჩივეცში” გაატარებს.
ამის შესახებ ქართველმა ლეგიონერმა “ილიჩივეცის” ოფიციალურ ვებგვერდთან საუბარში განაცხადა, რითაც წერტილი დაუსვა გავრცელებულ ხმებს გუნდიდან მისი სავარაუდო წასვლის შესახებ.
“ჩვენი კლუბის ყველა გულშემატკივარს დავამშვიდებ - “ილიჩივეციდან” წასვლის არავითარი სურვილი არ მაქვს. ზუსტად ვიცი, რომ უახლოეს წელიწადს მარიუპოლში გავატარებ და შევეცდები, ყველაფერი გავაკეთო, რათა განვლილ სეზონში ნაჩვენები შედეგი გავაუმჯობესოთ”, - განაცხად ოქრიაშვილმა, რომელიც შეტევაში მოგებული ორთაბრძოლებითა და “გამომუშავებული” ჯარიმებით, გასულ სეზონში უკრაინის პრემიერლიგაში საუკეთესო იყო.
“ილიჩივეცის” ვებგვერდის ცნობით, ოქრიაშვილმა გუნდთან ერთად ვარჯიში განაახლა. როგორც ირკვევა, სლოვენიაში შეკრებაზე მას ერთი კვირა იმიტომ არ უვარჯიშია, რომ კლუბთან თავისი ახალი კონტრაქტის დეტალებს არკვევდა.
აქვე გეტყვით, რომ უკრაინული მედიის ცნობით, ოქრიაშვილის საკუთარ რიგებში ხილვა ოდესის “ჩერნომორეცსა” და “სევასტოპოლს” სურდათ.
