ვეტერანი გერმანელი ჩოგბურთელი ტომი ჰაასი განაგრძობს ტრიუმფალურ სვლას მაიამიში მიმდინარე მასტერსზე. ტურნირის მეოთხედფინალურ ეტაპზე მან ძალზედ იოლად მოახერხა ფრანგი ჟილს სიმონის ორ სეტში დამარცხება 6:3, 6:1 და ნახევარფინალის საგზური მოიპოვა, სადაც იგი მსოფლიო რეიტინგის მეხუთე ჩოგან ესპანელ დავიდ ფერერს დაუპირისპირდება.

"პირველი სეტის მერვე გეიმში შესრულებულმა ბრეიკმა უდიდესი როლი ითამაშა ჩემს წარმატებაში, რამდენიმე ბრწყინვალე კომბინაცია ჩავატარე, რითაც ვამაყობ კიდეც. სწორედ ამიტომაც შემდეგ ძალიან დამაჯერებლად ჩავაწოდე სეტზე. მეორე პარტიაში უკვე თავს ძალიან კომფორტულად ვგრძნობდი, სტარტზევე შევძელი საკუთარი შანსების გამოყენება და ინიციატივას დავეუფლე. ჩემი ნაჩვენები თამაშის ხარისხით  კმაყოფილი ვარ, რადგან სრულად ვიყენებდი კორტს და ჭკვიანურად ვმოქმედებდი.

შემდეგი მატჩი დავიდ ფერერთან მექნება. იგი წლეულს საკმაოდ კარგად ასპარეზობს. მასთან დაპირისპირება ჩემთვის სერიოზული გამოცდა იქნება. დავიდს ბოლოს ძალიან დიდი ხნის წინ ვეთამაშე, ასე რომ ერთი სული მაქვს როდის დაიწყება მატჩი."

შეგახსენებთ, რომ ჰაასმა მასტერსის ნახევარფინალში  თამაში ბოლოს 2006 წელს მოახერხა (პარიზი).

 1000 სარეიტინგო ქულიანი ტურნიის მოგება ტომმა კარიერაში მხოლოდ ერთხელ შეძლო - 2001 წელს შტუტგარტში.

მაიამიში ნაჩვენები შესანიშნავი თამაშის შედეგად მომავალ ორშაბათს 34 წლის ჩოგბურთელი მსოფლიო რეიტინგის ტოპ 15-ში შევა (პირველად 2008 წლის იანვრის შემდეგ).