ნაგოიას ბაშოს მე-2 დღეს პირველი ქართული გამარჯვება ვიხილეთ. ტოჩინოშინის შიკონათი ცნობილმა ლევან გორგაძემ, რომელიც ივლისის სუპერტურნირს დასავლეთის მე-11 მაეგაშირას წოდებით შეხვდა, დასავლეთისვე მე-10 მაეგაშირა ჩიონოკუნი მიწას მოსწყვიტა და ცურიდაშით დაამარცხა.

ახლა, ტოჩინოშინის თანაბარი ბალანსი (1 მოგება, 1 წაგება) გააჩნია, შემდეგი ორთაბრძოლა კი აღმოსავლეთის მე-11 მაეგაშირა დაიდოსთან ელის, რომელმაც ორივე სასტარტო შეხვედრა წააგო. ქართველ სუმოისტს ტოკიოელთან გასული ოთხივე შერკინება მოგებული აქვს.

ჯერაც პირველი გამარჯვების მოლოდინშია ელიტარული მაკუუჩი დივიზიონის ყველაზე წევრი ბინადარი თეიმურაზ ჯუღელი. გაგამარუ ნაგოიას ბაშოზე დასავლეთის მე-2 მაეგაშირას ტიტულით ირჯება და ცხადია, გაჯიბრებაც გაცილებით ძლიერ მეტოქეებთან უწევს. ამჯერად, ქართველი გოლიათი ოძეკი კაკურიუს გადაეყარა და უვატენაგეთი დანარცხდა.

გაგამარუ სიტუაციის გამოსწორებას მე-3 ტურში ეცდება, თუმცა, ეს ძალიან ძნელი იქნება, რადგანაც ისევ ოძეკისთან ჭიდილი ელის. ფუკუოკელმა კოტოშოგიკუმ გასული ორივე შეხვედრა წარმატებულად დაასრულა, ჯუღელს კი ურთიერთშეხვედრებში 4:0-ს უგებს.

ივლისის სუპერტურნირის 2 დღის თავზე დამაჯერებლად ლიდერობენ იოკოძუნებუ ჰაკუჰო და ჰარუმაფუჯი და ოძეკები – კოტოშოგიკუ, კოტოოშუ და კისენოსატო. სანიაკუს (სიმბოლური კატეგორია, რომელიც იოკოძუნას, ოძეკის, სეკივაკეს და კომუსუბის ტიტულებს აერთიანებს) წევრთაგან ყველაზე ცუდად სეკივაკე გოეიდო გამოიყურება, რომელმაც ორივე სასტარტო ბრძოლა დათმო.

ნაგოიას ბაშოს მე-2 დღის მიმოხილვა

http://www.youtube.com/watch?v=cKZtALX_mPk&feature=player_embedded