26 წლის ლევან გორგაძემ ნაცუ ბაშოზე რანგით მე-3 მაკუშიტას დივიზიონის ჩემპიონობა მოიპოვა. ტოჩინოშინის შიკონათი ცნობილმა ქართველმა სუმოისტმა მაისის სუპერტურნირზე შვიდივე ორთაბრძოლა მოიგო, სულ კი, ტრავმის მოშუშების შემდეგ, ზურგს მიჯრით 14 გამარჯვება უმაგრებს.

იაპონიის დედაქალაქ ტოკიოში მიმდინარე ბაშოს მე-7 დღეს დასავლეთის მე-6 ნომრით მოასპარეზე გორგაძემ მანამდე ასევე დაუმარცხებელი აკუა ოშიტაოშით დაჯაბნა და მეტოქეთათვის მიუწვდომელი გახდა. აღსანიშნავია, რომ მაკუშიტაში შეჯიბრი დღეს დასრულდება, თუმცა, ქართველის დაწევის შანსი აღარავის აქვს.

ამგვარად, ტოჩინოშინი, რომელიც რამდენჯერმე კომუსუბის ტიტულსაც კი ატარებდა, მომავალი ბაშოდან რანგით მე-2 ძურიოს დივიზიონში იასპარეზებს.

შესაძლოა, ძურიოშივე აღმოჩნდეს გაგამარუს შიკონათი ცნობილი თეიმურაზ ჯუღელიც. ეს იმ შემთხვევაში მოხდება, თუკი ქართველი ელიტარულ მაკუუჩი დივიზიონში დარჩენილ ორივე ბრძოლას ვერ მოიგებს.

აღმოსავლეთის მე-14 მაეგაშირას წოდების მქონე გაგამარუმ 6 მოგების წილ მე-7 მარცხი აღმოსავლეთის მე-9 მაეგაშირა ტერუნოფუჯისთან განიცადა.

გორგაძეს შემდეგი ბრძოლა დასავლეთის მე-10 მაეგაშიტა ტოჩინოვაკასთან ელის, რომელსაც ურთიერთშეხვედრებში 4:2-ს ამარცხებს.

მაკუუჩის დივიზიონს 12 მოგებით ერთპიროვნულად იოკოძუნა ჰაკუჰო ლიდერობს, რომელსაც თითო გამარჯვებით იოკოძუნა ჰარუმაფუჯი, ოძეკი კისენოსატო და მე-5 მაეგაშირა იკოია ჩამორჩებიან.

ცნობისთვის, ჰაკუჰომ ოძეკი კოტოშოგიკუს მე-8 მარცხი აგემა და ეს უკანასკნელი კადობანში ჩააყენა. თუკი ეს უკანასკნელი ნაგოიაში დაგეგმილ მომავალ ბაშოზე დადებით ბალანსს ვერ დააფიქსირებს, ოძეკის წოდებას დაკარგავს.

 ნაცუ ბაშოს მე-13 დღის მიმოხილვა

http://www.youtube.com/watch?v=jXhOnFg1yLk

ტოჩინოშინი - აკუა 

http://www.youtube.com/watch?v=jKvPzfvukkY